پاکستان نے افغان وزارت خارجہ  کا  پشاور کی ایک مارکیٹ کے بارے میں جاری کردہ بیان مسترد کر دیا۔

ترجمان دفترخارجہ نے  افغان دفتر خارجہ کے بیان پررد عمل دیتے ہوئےکہا کہ پشاور میں افغان مارکیٹ سے متعلق واقعات کا ایک مسخ شدہ اور گمراہ کن بیان جاری کیا گیا۔

ترجمان دفتر خارجہ کا کہنا ہے کہ پاکستان میں عدالتی عمل پر اثرانداز ہونے والے تبصرے کو مسترد کرتے ہیں، نجی قانونی معاملے پر دونوں برادر ممالک کے مابین تعلقات کو بری طرح متاثر کرنے کی اجازت نہیں ہوگی۔

انہوں نے کہا کہ  مارکیٹ کا مسئلہ شہری اور افغانستان سے تعلق رکھنے والے بینک کے مابین تھا اور اس کیس کا فیصلہ 1998 میں  شہری کے حق میں کیا گیا تھا۔

انہوں نے مزید کہا کہ پشاور میں افغانستان کے قونصلیٹ جنرل کو احتجاج کے طور پر بند کرنے پر افسوس ہوا ہے، امید کرتے ہیں کہ پشاور میں افغانستان کے قونصلیٹ جنرل کو بند کرنے کے اقدام کا فوری طور پر جائزہ لیا جائے گا۔

 واضح رہے کہ اس سے قبل پشاور میں افغان قونصل خانہ بند کر دیا گیا تھا۔

افغان قونصل جنرل محمد ہاشم نیازی نے کہا کہ افغان ملکیتی مارکیٹ سے جھنڈا اتارا گیا، دوکانداروں کو ماراگیا اس لیے ہم نے قونصل خانہ بند کردیا ہے، ہم نے پچھلی بار بھی جھنڈا اتارے جانے پر کہا تھا اگر یہ جھنڈا دوبارہ اتارا گیا تو قونصل خانہ بند کردیں گے۔

افغان قونصل جنرل کا کہنا تھا کہ ہم اس اقدام کی شدید مذمت کرتے ہیں، حالات حساس ہیں، ایسے وقت میں ایسا نہی کرنا چاہئے تھا، قبضہ مافیا کو روکا جائے، پاکستان کو فیصلہ واپس لینا چاہئے اور اس کا سفارتی سطح پر حل تلاش کرنا چاہیے۔