احتساب عدالت میں جعلی اکاؤنٹس کیس میں آصف علی زرداری کو جیل سے ہسپتال منتقل کرنے کیلئے درخواست پر فیصلہ محفوظ کر لیا گیا ہے۔

تفصیلات کے مطابق اسلام آباد کی احتساب عدالت کے جج محمد بشیر نے جعلی بینک اکاؤنٹس کیس کے ملزم آصف علی زرداری کو بیماری کے باعث اڈیالہ جیل سے پمز منتقل کرنے کی درخواست پر سماعت کی۔

ذرائع کے مطابق دورانِ سماعت وکیل لطیف کھوسہ نے کہا کہ آصف زرداری کی جان کو خطرہ ہے، جیل میں طبی سہولیات ملنا آصف زرداری کا حق ہے، زرداری اس حکومت سے کچھ بھی نہیں لینا چاہتے لیکن جو قانونی حق ہے وہ دیا جائے۔

وکیل لطیف کھوسہ کا کہنا تھا کہ ہم نے ضیا الحق سے بھی معافی نہیں مانگی تھی، عدالتی ریلیف ہمارا حق ہے، زرداری صاحب کو دل کی تکلیف ہوئی تو یہ لوگ ہسپتال نہیں پہنچا سکیں گے، اڈیالہ جیل سے ہسپتال تک ڈیڑھ گھنٹہ لگ جاتا ہے۔

لطیف کھوسہ کا مزید کہنا تھا کہ میڈیکل بورڈ نے طبی سہولیات کے لئے آصف زرداری کو پمز منتقل کرنے کا کہا، یہ لوگ ایک دن پمز لیکر گئے دوسرے دن واپس جیل لے گئے، جب تک زرداری جیل میں ہیں ذاتی اٹینڈینٹ ساتھ رکھنے کی اجازت بھی دیں، ہمارے لوگ جیل کے باہراپنا خیمہ لگا لیں گے، جوصرف صبح اور شام اندر جا کر چیک کریں گے۔

آصف علی زرداری کو جیل سے اسپتال منتقل کرنے کے لئے درخواست پر لطیف کھوسہ کے دلائل مکمل طو ر پر سننے کے بعد درخواست پر فیصلہ محفوظ کر لیا گیا ہے۔