پاکستان نےلائن آف کنٹرول (ایل او سی) پربھارتی فوج کی بلااشتعال فائرنگ اور سیزفائرمعاہدے کی خلاف ورزی پربھارتی ڈپٹی ہائی کمشنرگورواہلووالیا کودفترخارجہ طلب کرکےاحتجاج ریکارڈ کروایاہے۔

ترجمان دفترخارجہ کے مطابق بھارتی ڈپٹی ہائی کمشنر کو ایل او سی پرسیزفائر کی مسلسل خلاف ورزیوں پراحتجاجی مراسلہ تھمایا گیا ہے۔

ترجمان دفترخٓارجہ کاکہناہے کہ بھارتی افواج نےایل او سی کے نیزہ پیرسیکٹرپرشہری آبادی پربلااشتعال فائرنگ کی، بھارتی فوج کی فائرنگ سے ایک بزرگ اور بچی شہید ہوئےجبکہ 8 بے گناہ شہری زخمی بھی ہوئے۔

ترجمان کےمطابق بھارتی افواج لائن آف کنٹرول پرتسلسل سےشہری آبادی کو خودکار اور بھاری اسلحہ سے نشانہ بنا رہی ہیں،بھارت کی جانب سے 2017ء سے جنگ بندی کی خلاف ورزیوں میں تیزی آئی ہے۔

ترجمان دفترخارجہ کاکہناہےکہ بھارت نے 2017ء میں 1970 مرتبہ جنگ بندی کی خلاف ورزی کی، بھارتی افواج کا بے گناہ شہریوں کوجان بوجھ کر نشانہ بنانا انتہائی قابل مذمت ہے۔

ترجمان کاکہناہے کہ بھارتی فوج کا شہری آبادی کو نشانہ بنانابین الاقوامی انسانی حقوق اور قوانین کی خلاف ورزی ہےاوربھارت کی طرف سے مسلسل جنگ بندی کی خلاف ورزیاں علاقائی امن و سلامتی کے لئے خطرہ ہیں۔

ترجمان نےمزید کہاکہ بھارت کی یہ خلاف ورزیاں کسی سنگین اسٹریٹجک غلط فہمی کا باعث بن سکتی ہیں،بھارت 2003ء کی جنگ بندی کے معاہدے کا احترام یقینی بنائے۔

ترجمان دفتر خارجہ نے اس بات پرزور دیا کہ بھارت اپنی افواج کوجنگ بندی پرکاربند رہ کرمکمل عملدرآمد کی ہدایت اورجنگ بندی کی خلاف ورزیوں کے واقعات کی تحقیقات کویقینی بنائے۔

ترجمان دفترخارجہ کامزیدکہناہے کہ بھارت لائن آف کنٹرول اور ورکنگ باونڈری پر معاہدے کی حقیقی روح کے مطابق امن برقرار رکھےاوراقوام متحدہ کےفوجی مبصرین کوسلامتی کونسل کی قراردادوں کےمطابق اپناکردارادا کرنےدے۔