احتساب عدالت نے حمزہ شہباز کے جوڈیشل ریمانڈ میں 30 اکتوبر تک توسیع کر دی ہے۔

تفصیلات کے مطا بق احتساب عدالت نے پنجاب اسمبلی میں اپوزیشن لیڈر حمزہ شہباز کے جوڈیشل ریمانڈ میں 30 اکتوبر تک توسیع کر دی گئی ہے، حمزہ شہباز کو جوڈیشل ریمانڈ ختم ہونے پر احتساب عدالت میں پیش کیا گیا۔

ذرائع کے مطابق عدالت نے نیب کو رمضان شوگر ملز ریفرنس میں قانونی کارروائی مکمل کرنے کی ہدایت کر دی جبکہ عدالت نے حمزہ شہباز کے جوڈیشل ریمانڈ میں بھی توسیع کی۔

 حمزہ شہباز کی عدالت میں پیشی کے موقع پرلیگی کارکن احتساب عدالت کے باہر جمع ہوگئےاور اپنی جماعت کے حق اور حکومت کے خلاف نعرہ با زی بھی کی۔

مسلم لیگ ن کے رہنما اور سابق وزیر اعلی پنجاب شہباز شریف کیخلاف بھی آشیانہ ہاؤسنگ سوسائٹی ریفرنس میں گواہوں کے بیانات ریکارڈ کیے گئے ہیں۔

ذرائع کے مطابق سماعت کے دوران شریک ملزم فواد حسن فواد اور احد چیمہ بھی پیش ہوئے، عدالت نے شہباز شریف کی ایک روز کی غیرحاضری کی معافی کی درخواست منظور کر لی، آئندہ سماعت پر گواہ ثاقب الرحمن اور شکیل احمد کو مزید بیان قلمبند کرنے کیلئے طلب کر لیا اور آشیانہ اقبال سکینڈل کیس کی سماعت 24 اکتوبر تک ملتوی کر دی۔

امجد پرویز ایڈووکیٹ کا کہنا تھا کہ شہباز شریف بیماری کی وجہ سے پیش نہیں ہو سکتے، شہباز شریف کی حاضری معافی کی درخواست دائر کی جائے گی۔

پراسکیوٹرکا کہنا تھا کہ شہبازشریف کی مسلسل عدالت سے غیر حاضریاں ہورہی ہیں۔