گورنر سندھ عمران اسماعیل نے کہا ہے کہ عام آدمی کی فلاح و بہبود کے لیے مسائل کو حل کرنے کے یقینی اقدامات کئے جائیں گے۔

تفصیلات کے مطابق گورنر سندھ عمران اسماعیل سے کراچی کے پی ٹی آئی کے منتخب ایم این ایز کی گورنر ہاؤس میں ملاقات ہوئی جس میں کراچی سمیت سندھ کے دیگر اضلاع کی صورت حال پر جائزہ لیا گیا۔

گورنرسندھ کا کہنا تھا کہ حکومت کی موثر معاشی پالیسیوں اور انتھک کوششوں کی وجہ سے مثبت نتائج حاصل ہو رہے ہیں جنہیں بین الاقوامی سطح پر بھی تسلیم کیا جا رہا ہے۔ امید کی اس کرن نے پاکستان کو اقوام عالم میں اپنا بہتر مقام بنانے اور بین الاقوامی سرمایہ کاروں کے اعتماد کو بھی بہتر بنانے میں مدد دی ہے۔

گورنرسندھ کا کہنا تھا کہ عام آدمی کی فلاح و بہبود کے لیے مسائل کو حل کرنے کے یقینی اقدامات کئے جائیں جبکہ عوام کی فلاح و بہبود ، صوبے میں سیاسی اور ریاستی اداروں کی مضبوطی اور اپنی آئینی ذمہ داریوں کو نبھانے کے لیے پوری کوشش جاری ہے۔

گورنر سندھ عمران اسماعیل کا مزید کہنا تھا کہ تمام ایم این ایز اپنے اپنے حلقوں میں ترقیاتی کاموں کی ذاتی طور پر نگرانی کریں گے اور اسکیموں، منصوبوں کی بروقت تکمیل کو یقینی بنائیں گے۔

اجلاس میں رکن قومی اسمبلی اسلم خان ، فہیم خان ، عطا اللہ خان ، سیف الرحمن ، کیپٹن جمیل ، عالمگیر خان اور عبدالشکور شاد شامل تھے۔