معاون خصوصی ڈاکٹر فردوس عاشق اعوان نے کہا ہے کہ پاکستان کشمیر کے بغیر نامکمل ہے، ہمیں کشمیریوں کے حق میں ذاتی مفادات سے بالاتر ہو کر کام کرنا چاہیے۔

تفصیلات کے مطابق مقبوضہ کشمیر کے مظلوم او رنہتے کشمیریوں کی اندوہناک کہانی پر تھیٹر کا انعقاد کیا گیا۔

تقریب سے خطاب کرتے ہوئے معاون خصوصی اطلاعات و نشریات ڈاکٹر فردوس عاشق اعوان کا کہنا تھا کہ کشمیر کے حوالے سے تھیٹر میں تمام فنکاروں نے بہترین کام کیا۔

فردوس عاشق اعوان نے کہا کہ اداکاروں نے پورے ملی جذبے کے ساتھ کارکردگی دکھا کر قوم کے ہر طبقے کے جذبات کی عکاسی کی ہے ، مقبوضہ کشمیر کی اصل صورتحال سامنے لانے پر اداکار خراج تحسین کے مستحق ہیں۔

معاون خصوصی نے یہ بھی کہا کہ وزیراعظم کشمیریوں کے ترجمان ، سفیر اور وکیل بن کرکشمیریوں کی نمائندگی کر رہے ہیں جبکہ کشمیری بھی ہر قسم کے جبر اور استحصال  کا بہادری سے مقابلہ کر رہے ہیں۔

ڈاکٹر فردوس عاشق اعوان کا کہنا تھا کہ بھارت یو این کی قراردادوں پر بھی عمل درآمد نہیں کر رہا، بھارتی افواج کشمیر کے نوجوانوں کو نشانہ بنا کر بنیادی انسانی حقوق کی خلاف ورزیاں کر رہا ہے۔

فردوس عاشق اعوان کا یہ بھی کہنا تھا کہ بھارت نے کشمیر کو دنیا کی سب سے بڑی جیل میں تبدیل کر دیا گیا ہے، عالمی برادری کو چاہیئے کہ وہ مسئلہ کشمیر کے حل کیلئے اپنا کردار ادا کرے۔

معاون خصوصی ڈاکٹر فردوس عاشق اعوان کا مزید کہنا تھا کہ کشمیر کی اصل صورتحال دنیا پر مزید واضح کرنے کی ضرورت ہے، انسانی حقوق کے مسئلے پر حکومت اور پاکستانی اپنے کشمیری بہن بھائیوں کے ساتھ ہیں۔