حکومت نے لیگی رہنما مریم نواز کو سروسزاسپتال میں زیرعلاج والد کی تیمارداری کیلئے انکے ہمراہ رہنے کی اجازت دے دی گئی ہے۔

تفصیلات کے مطابق مریم نواز سروسز اسپتال میں زیرعلاج نواز شریف کی دیکھ بھال کرسکتی ہیں ، وزیراعظم نے پنجاب حکومت کو اس سلسلے میں تمام انتظامات مکمل کرنے کی ہدایت بھی کردی۔

گورنر پنجاب چوہدری  سرور نے بتایا انکی وزیراعظم عمران خان سے  نواز شریف کی صحت سے متعلق بات ہوئی، جس میں عمران خان نے واضح ہدایت کی کہ سابق وزیراعظم کو صحت کی تمام سہولیات فراہم کی جائیں۔

گورنر پنجاب کا کہنا ہے کہ وزیر اعظم نے مریم کی منتقلی کے لیے قانونی تقاضے پورے کرنے کی ہدایت جاری کر دی ہے۔

خیال رہے کہ اس سے قبل سابق وزیر اعظم کی صاحب زادی مریم نواز کو طبعیت بہتر ہونے پر سروسز اسپتال سے کوٹ لکھپت جیل منتقل کر دیا گیا تھا، مریم نواز کی گزشتہ رات والد سے ملاقات کے دوران طبعیت ناساز ہو گئی تھی جس کے بعد انھیں سروسز اسپتال میں ہی داخل کیا گیا تھا۔

جیل واپسی کے وقت بھی ان کی طبیعت خراب تھی، ہائی بلڈپریشراور دل کی دھڑکن نارمل نہیں تھی، ڈاکٹرز نے ٹیسٹس کے بعد مریم نواز کو اسپتال داخل کرنے کا فیصلہ کیا تھا۔

یاد رہے کہ مسلم لیگ ن کی مرکزی نائب صدر کو طبیعت ناساز ہونے پر گزشتہ دن لاہور کے سروسز اسپتال منتقل کیا گیا تھا،مریم نواز کا ڈینگی اور سی بی سی ٹیسٹ بھی کیا گیا تھا۔