وزیرداخلہ شیخ رشید احمد نے کہا ہے کہ سازش کے تحت پاک نیوزی لینڈ سیریز کو ختم کرنے کی کوشش کی گئی۔

تفصیلات کے مطابق وزیرداخلہ شیخ رشید احمد نے پریس کانفرنس کرتے ہوئے کہا کہ نیوزی لینڈ کی ٹیم کو مکمل طور پر سیکیورٹی فراہم کی جبکہ ہمارے اداروں نے بہت کوشش بھی کی کہ وہ مان جائیں لیکن نیوزی لینڈ کی ٹیم نے یکطرفہ طور پر اپنا دورہ منسوخ کیا۔

وزیرداخلہ نے کہا کہ وزیرعظم عمران خان نے نیوزی لینڈ کی وزیراعظم سے بات کی، نیوزی لینڈ کی وزیراعظم نے کہا تھریٹ کا مسئلہ نہیں ہے۔

شیخ رشید احمد نے یہ بھی کہا کہ ہماری پولیس، افواج سمیت کسی ادارے کے پاس کوئی تھریٹ نہیں ، نیوزی لینڈ کے دورے کو ایک ساز ش کے تحت ختم کیا گیا ہے۔

وزیرداخلہ کا کہنا تھا کہ پاکستان دنیا میں امن اور سکون کا سب سے بڑا داعی ہے، پاکستان دہشتگردی سے نمٹنے کیلئے انتہائی مضبوط اور زبردست ادارے رکھتا ہے۔

شیخ رشید احمد کا یہ بھی کہنا تھا کہ یہ کس کی سازش ہے میں یہاں نام نہیں لینا چاہتا۔ دستانے پہنے ہوئے ہاتھوں نے سازش کی، دستانے پہنے ہوئے ہاتھ پاکستان کو قربانی کا بکرا بنانا چاہتے تھے۔

وزیر داخلہ نے کہا کہ افغانستان میں کوئی خون ریزی نہیں ہوئی، نہیں چاہتے کہ افغانستان میں کوئی بھوکا مرے۔ افغانستان کو کب تسلیم کرنا ہے یہ فیصلہ عمران خان نے کرنا ہے۔

شیخ رشید احمد نے یہ بھی کہا کہ معلوم ہوا ہے کہ پاکستان میں کرکٹ کیلئے سیکیورٹی کا کوئی مسئلہ نہیں ہے۔ انگلینڈ کی ٹیم بھی 24 سے 48 گھنٹے میں اپنا فیصلہ کر لے گی، انگلینڈ کی ٹیم جو بھی فیصلہ کرے گی وہ ان کا اپنا فیصلہ ہوگا۔

وزیرداخلہ شیخ رشید احمد نے مزید کہا کہ ہمیں کوئی مسئلہ نہیں ہے، اگر انگلینڈ کی ٹیم پاکستان آئے گی تو ان کی سیکیورٹی کیلئے بھی زبردست انتظامات کئے جائیں گے۔

واضح رہے کہ آج نیوزی لینڈ کرکٹ بورڈ نے پی سی بی کو آگاہ کیا  تھا کہ انہیں سیکیورٹی کے حوالے سے الرٹ کیا گیا ہے اس لیے یکطرفہ طور پر سیریز ملتوی کرنے کا فیصلہ کیا ہے۔

پاکستان کرکٹ بورڈ اور حکومت پاکستان نے مہمان ٹیم کی سیکیورٹی کے لیے فول پروف انتظامات کررکھے تھے جس پر   نیوزی لینڈ ٹیم کے آفیشلز نے اطمینان کا اظہار کیا تھا۔

اس سے قبل وزیر اعظم  عمران خان  نے ذاتی طور پر نیوزی لینڈ کی وزیراعظم  جیسنڈا آرڈرن سے رابطہ کرکے انہیں بتایا  تھا کہ ہماری سیکیورٹی انٹیلیجنس دنیا کی ایک بہترین ایجنسی ہے اور مہمان ٹیم کو کوئی سیکیورٹی تھریٹ نہیں ہے۔