پاکستان کے نامور کامیڈین عمر شریف کےکے صاحبزادے جواد شریف نے بتایا ہے کہ والد کے ساتھ ایئر ایمبولینس میں خاندان کے افراد امریکہ جائے گے۔

تفصیلات کے مطابق عمر شریف کے صاحبزادے جواد شریف نے بتایا ہے کہ والد کی امریکا منتقلی کے لیے ایئر ایمبولینس جلد کراچی پہنچے گی۔

جواد شریف نے مزید کہا کہ سندھ حکومت کی جانب سے ایئر ایمبولینس کے اخراجات کی ادائیگی آج ہونے کی امید ہے۔

انہوں نے یہ بھی کہا کہ ایئر ایمبولینس میں طبی عملے کے علاوہ خاندان کے 2 افراد روانہ ہوں گے۔

اس کے علاوہ کامیڈین و اداکار عمر شریف کے بیٹے جواد عمر کا کہنا ہے کہ والد کی طبیعت پہلے سے بہتر ہے۔

اداکار عمر شریف کے بیٹے کا مزید کہنا ہے کہ بیرونِ ملک روانگی کیلئے ویزے مل گئے ہیں، والد کی طبیعت بہتر ہے، جلد علاج کے لیے روانہ ہوں گے۔

تاہم ایئر ایمبولینس کیلئے پراسس جاری ہے۔

خیال رہے کہ عُمر شریف اس وقت متعدد بیماریوں کے باعث کراچی کے ایک نجی اسپتال میں زیرِ علاج ہیں۔

واضح رہے کہ عُمر شریف نے وزیرِ اعظم عمران خان سے درخواست کی تھی کہ وہ بیرونِ ملک سرجری کے لیے اُنہیں جلد از جلد امریکی ویزا جاری کریں۔

اس حوالے سے گزشتہ روز وزیرِ اعظم عمران خان کے معاونِ خصوصی برائے سیاسی روابط شہباز گِل نے ٹوئٹر پر جاری بیان میں اس بات کی تصدیق کی کہ عمر شریف اور ان کے اہلِ خانہ کو امریکا کے ویزے جاری کر دیئے گئے ہیں۔

اداکار عمر شریف اور ان کی فیملی کو امریکہ کا 5 سالہ ویزہ مل گیا ہے۔

انٹر نیشنل آرٹسٹ پرموٹر ریحان صدیقی نے اپنے ایک بیان میں کہا کہ لیجنڈ عمر کو جلد ہی ائیرایمبولینس کے ذریعے امریکہ پہنچا دیا جائے گا جس پر پاکستان گورنمنٹ کا شکر گزار ہوں۔

ریحان صدیقی نے  کہا کہ عمر بھائی اور ان کی فیملی انشاءاللہ، واشنگٹن ڈی سی ائیر ایمبولینس پر آرہے ہیں جہاں پر ڈاکٹر شہاب اور ان کی پوری  ٹیم ہر طریقے سے تیار ہے۔

انہوں نے کہا کہ امید ہے ڈاکٹر شہاب اور ان کی ٹیم کی قیادت میں آپریشن واشنگٹن ڈی سی میں کامیاب ہوگا۔

ریحان صدیقی نے مزید کہا کہ عمر شریف  کو زیادہ سے زیادہ کوریج دینے اور دنیا بھر میں پھیلانے کے لئے میڈیا کا بہت شکر گزار ہوں۔

ان کا کہنا تھا کہ حکومت پاکستان اور سندھ گورنمنٹ کا شکریہ ادا کرتا ہوں جنہوں نے لیجنڈ عمر شریف کے ساتھ تعاون کیا۔

انٹر نیشنل آرٹسٹ پرموٹر ریحان صدیقی نے امریکی سفارت خانے اور کانگریس کی خاتون شیلا جیکسن کا بھی شکریہ ادا کیا۔