پاکستان پیپلز پارٹی کے سیکرٹری جنرل نیئر بخاری  نے یہ بھی کہا کہ حکومت کا خاتمہ کر کے ہی گھروں کو لوٹیں گے۔

تفصیلات کے مطابق جنرل سیکرٹری پی پی پی سید نیئر حسین بخاری نے کارکنان سے خطاب کرتے ہوئے کہا کہ پاکستان پیپلز پارٹی نے مہنگائی کے خلاف مہم کی بنیاد رکھی ہے، اس تحریک کو پورے پاکستان تک لے کر جائیں گے۔

سید نیئر حسین بخاری کا کہنا تھا کہ سبزیوں اور چینی کی قیمتیں آسمان سے باتیں کر رہی ہیں جبکہ گھی 195 روپے کلو تھا اب گھی 345 روپے کلو تک پہنچ چکا ہے۔

جنرل سیکرٹری پی پی پی نے کہا  کہ عمران خان پر جن لوگوں نے اعتماد کیا عمران خان نے ان کے گھروں میں ڈاکا ڈالا۔ عمران خان کہتا تھا کہ مہنگائی ہو تو حکمران چور ہوتا ہے، اب عمران خان بتائے کہ کون چور ہے۔

 سید نیئر حسین بخاری کا یہ بھی کہنا تھا کہ پیپلز پارٹی کبھی کسی کی سہولت کار نہیں بنی، پی پی پی کے کارکنان اور قیادت نے قربانیاں دی۔

جنرل سیکرٹری پی پی پی سید نیئر حسین بخاری نے مزید کہا کہ نااہل اور نا کام حکمرانوں سے جان چھڑائیں گے، اب عوام گھروں سے نکل آئی ہے اور اس حکومت کا خاتمہ کر کے ہی گھروں کو لوٹیں گے۔

واضح رہے اس سے قبل پیپلزپارٹی کے سیکرٹری جنرل نیئر بخاری نے اپنے ایک بیان میں کہا تھا کہ جب پی ڈی ایم کی بنیاد رکھی تھی تو ہمارا ایک ہی ایجنڈا تھا اور اس ایجنڈے پر پیپلزپارٹی آج بھی متفق ہے۔

نیئر بخاری کا کہنا تھا کہ سیاسی جماعتوں میں اختلافات ہوتے ہیں پر ان اختلافات کو دور کرنے کے لئے پہل کی جاتی ہے۔

پیپلز پارٹی کے سیکرٹری جنرل نیئر بخاری کا مزید کہنا  تھا کہ پیپلزپارٹی کا آج بھی یہی مؤقف ہے وہ نااہل حکومت سے نجات چاہتے ہیں، اس پر جو چارٹر دیا اور ایکشن پلان بنایا تھا اس پر آج بھی قائم ہیں اور دیگر جماعتوں کو بھی اس کے مطابق پیشرفت کرنی چاہیے۔