آج مقبوضہ کشمیر پربھارت کے غاصبانہ قبضے کا دن ہے، پاکستان سمیت دنیا بھر میں موجود پاکستانی و کشمیری شہری 27 اکتوبر 1947 کو کشمیر پر بھارتی غاصبانہ قبضے کے خلاف آج یوم سیاہ منارہے ہیں۔

تفصیلات کے مطابق پاکستان اور ایل او سی کے دونوں جانب کشمیری اس دن کو یوم سیاہ کے طور پر منا رہے ہیں۔

صدر مملکت عارف علوی نے یوم سیاہ کشمیر کےموقع پراپنے پیغام میں کہا کہ پاکستان کشمیریوں کےساتھ کھڑا ہے اور پوری دنیا میں کشمیریوں کے حقوق کی بات کرتا ہے، کشمیریوں کا مقدمہ پاکستان کا مقدمہ ہے، ہر عالمی فورم پر کشمیریوں کا مقدمہ اٹھائیں گے۔

وزیراعظم عمران خان نے ایک بار پھر عالمی برادری سے کشمیر میں بھارتی مظالم ختم کرانے کا مطالبہ کرتے ہوئے کہا ہے کہ یوم سیاہ کشمیر پاکستان سمیت دنیا بھر میں منایا جارہا ہے،اس سال یوم سیاہ ماضی کی نسبت مختلف اورنمایاں ہے۔

وزیراعظم عمران خان نے مزید کہا کہ بھارتی ریاستی دہشت گردی آج پہلے سے کہیں زیادہ سفاکانہ رخ اختیار کر گئی ہے، نام نہاد “بڑی جمہوریت” ہونے کے دعویدار بھارت کا اصل چہرہ مکمل طورپر بے نقاب ہوچکا ہے۔

عمران خان کا کہنا ہے کہ کشمیری بھائیوں و بہنوں کو یقین دلاتے ہیں کہ پاکستان ہمیشہ ان کے شانہ بشانہ کھڑا رہے گا، پاکستان کشمیریوں کی اقوام متحدہ کی قرار دادوں کے مطابق حق خود ارایت کے حصول تک ان کی ہر سطح پر حمایت جاری رکھے گا۔

ذرائع کے مطابق مقبوضہ کشمیر پربھارتی قبضے کوآج 72سال ہو گئے ہیں، کشمیری آج بھی اپنے حق سے محروم ہیں،27 اکتوبر 1947 کو بھارت نے بین الاقوامی قوانین کی خلاف ورزی کرتے ہوئے جموں و کشمیر پر قبضہ کیا،

آج حریت کانفرنس نے لال چوک کی جانب مارچ کا اعلان کیا ہے جبکہ پاکستان میں بھی شہر، شہر ریلیاں اور مظاہرے کئے جا رہے ہیں۔

وزیرخارجہ شاہ محمود قریشی نے اپنے پیغام میں کہا ہے کہ 27 سال پہلے آج کےدن بھارتی افواج نے جنت نظیر وادی پرغیر قانونی قبضہ کیا اور اب 5 اگست سے بھارت نے مقبوضہ کشمیر کو عملاً ایک جیل میں تبدیل کر دیا ہے، بھارت نےغیرقانونی ہتھکنڈوں سے مقبوضہ کشمیرمیں آبادی کا تناسب تبدیل کرنےکے اقدامات کیے۔

اقوام متحدہ میں پاکستان کی سابق مستقل مندوب ڈاکٹر ملیحہ لودھی نے یوم سیاہ کشمیر کے موقع پر کہا ہے کہ ہر دن یوم سیاہ ہے جب تک کشمیریوں کو حق خودارادیت نہیں ملتا،پاکستان کا نیو یارک میں مشن کشمیر کے عوام کا بھی مشن ہے۔