صوبائی وزیر صنعت وتجارت میاں اسلم اقبال کا کہنا ہے کہ دوبئی ایکسپو کے ذریعے پنجاب کی سرمایہ کاری کے پوٹینشل کو عالمی سطح پر اجاگر کیا جائے گا۔

تفصیلات کے مطابق صوبائی وزیر صنعت وتجارت میاں اسلم اقبال کی زیر صدارت دوبئی ایکسپو کے حوالے سے اسٹیئرنگ کمیٹی کا چوتھا اجلاس ہوا جس میں دوبئی ایکسپو میں پنجاب حکومت کی شرکت کے حوالے سے انتظامات کا جائزہ لیا گیا۔

اجلاس میں دوبئی میں انٹرنیشنل بزنس کانفرنس کا انعقاد، ایڈوانس ٹیم بھجوانے، دوبئی ایکسپو کے حوالے سے مالیاتی امور اور دیگر معاملات کا جائزہ لیا گیا۔

صوبائی وزیر صنعت وتجارت کا کہنا ہے کہ دوبئی ایکسپو 2020ء کو نتیجہ خیز بنانے کے لئے محکمے معیاری ڈاکو مینٹریز اور مواد تیار کریں، دوبئی ایکسپو کے ذریعے پنجاب کے سرمایہ کاری کے پوٹینشل کو عالمی سطح پر اجاگر کیا جائے گا۔

انہوں نے کہا کہ ماہ نومبر میں دوبئی میں پنجاب حکومت کی طرف سے انٹرنیشنل بزنس کانفرنس کے انعقاد سے پنجاب میں نئی سرمایہ کاری آئے گی، انٹرنیشنل بزنس کانفرنس کے مہمان خصوصی وزیر اعلیٰ پنجاب سردار عثمان بزدار ہوں گے۔

اسلم اقبال نے کہا ہے کہ انٹرنیشنل بزنس کانفرنس میں ایوان ہائے صنعت وتجارت اور بزنس کمیونٹی کی بھ پور شرکت ہوگی، دوبئی ایکسپو کے ذریعے پنجاب میں صنعت کاری کے عمل کو تیز کرنے کے لئے اٹھائے گئے اقدامات سے سرمایہ کاروں کو آگاہی دی جائے گی۔

صوبائی وزیر صنعت وتجارت میاں اسلم اقبال نے مزید کہا ہے کہ دوبئی ایکسپو میں شرکت کرنے والے پنجاب کے محکمے اپنے انتظامات جلد مکمل کریں۔

واضح رہے کہ اجلاس میں سیکرٹری صنعت وتجارت ڈاکٹر واصف خورشید، چیف ایگزیکٹو آفیسر پنجاب سرمایہ کاری بورڈ ڈاکٹر ارفع اقبال اور متعلقہ محکموں کے افسران شریک ہوئے۔