ن لیگی رکن اسمبلی صہیب احمد ملک نے کہا ہے کہ تبدیلی سرکار کا کام ہمیں نظر کیوں نہیں آ رہا ہے؟

تفصیلات کے مطابق مسلم لیگ ن کے رکن اسمبلی صہیب احمد ملک اور پارلیمانی سیکرٹری غضنفر عباس شاہ کے درمیان پنجاب اسمبلی میں وقفہ سوالات کے دوران گرما گرمی ہو گئی ہے۔

ن لیگی رکن اسمبلی صہیب احمد ملک نے اسمبلی میں کہا کہ جناب ڈپٹی اسپیکر، تبدیلی سرکار کہاں کام کر رہی ہے؟ اور اگر کر رہی ہے تو ہمیں نظر کیوں نہیں آ رہا؟

صہیب احمد ملک نے کہا کہ پارلیمانی سیکریٹری ایوان میں مکمل تفصیلات بتائیں، میں کسی کا سفارشی نہیں ہوں جو پارلیمانی سیکرٹری مجھے غیرمناسب جواب دے رہے ہیں۔

ذرائع کا کہنا ہے کہ صہیب احمد سرگودھا میں سرکاری زرعی زمین پر ناجائز قابضین سے واگزار کروانے کے سوال پر آپے سے باہر ہوگئے جس پر ڈپٹی اسپیکر نے انہیں سیٹ پر بٹھا دیا۔

صہیب احمد نے کہا کہ پارلیمانی سیکرٹری بتائیں کہ کس کس سرکاری زمین پر قبضہ ہوا اور کون کون سی زمین عدالت میں زیر سماعت ہے؟

پارلیمانی سیکرٹری غضنفر عباس شاہ نے ایوان میں صہیب احمد ملک کو جواب دیتے ہوئے کہا کہ جناب ڈپٹی اسپیکر، اپوزیشن والوں کا وطیرہ بن گیا ہے، سوال کرنے کے بجائے حکومت پر تنقید کرتے ہیں۔ قوانین کے مطابق ممبر پہلے ایوان میں سوال کرتا ہے نہ کہ پہلے تنقید کرتا ہے۔

غضنفر عباس شاہ نے کہا کہ جو وطیرہ صہیب احمد اپنا رہے ہیں کہ پہلے تنقید کریں پھر اپنا سوال کریں تو یہ کوئی طریقہ نہیں ہے، میں اس رویہ پر ہر گز جواب نہیں دوں گا۔

ڈپٹی اسپیکر نے صہیب ملک کو مخاطب کرتے ہوئے کہا کہ صہیب احمد ملک آپ  ایوان میں بیٹھے ہیں، اگر آپ نے اس طرح کی زبان استعمال کرنی ہے تو ایوان سے باہر چلے جائیں۔

ذرائع کے مطابق ڈپٹی اسپیکر نے صہیب بھرت کو اپنی سیٹ پر بیٹھنے کا کہتے ہوئے کہا کہ یہ پنجاب اسمبلی کا ایوان ہے کوئی عام جگہ نہیں ہے۔