احتساب عدالت نے خواجہ سعد رفیق اور ان کے بھائی خواجہ سلمان رفیق کے جوڈیشل ریمانڈ میں مزید 14 روز کی توسیع کر دی ہے۔

تفصیلات کے مطا بق احتساب عدالت نے پیراگون ریفرنس میں مسلم لیگ ن کے رہنمااور سابق وزیر ریلوے خواجہ سعد رفیق اور ان کے بھائی خواجہ سلمان رفیق کے جوڈیشل ریمانڈ میں مزید 14 روز کی توسیع کر دی ہے۔

ذرائع کے مطا بق عدالت نے دونوں بھائیو ں کو 13 نومبر کو دوبارہ عدالت میں پیش کرنے کا حکم دیتے ہوئے آئندہ سماعت پر مزید گواہان کو بیان قلمبند کرانے کے لیے بھی طلب کر لیا ہے۔

احتساب عدالت کے جج جواد الحسن پیراگون ریفرنس میں خواجہ برادران کے جوڈیشل ریمانڈ ختم ہونے پرکیس کی سماعت کی جبکہ عدالت میں مقدمے کے پانچ گواہان اعجاز احمد، مقصود احمد، غلام مصطفی، جوڈیشل مجسٹریٹ ذولفقار باری نے اپنے بیان قلمبند کرائے۔

واضح رہے کہ احتساب عدالت نے ریفرنس کے 3 ملزموں ندیم ضیاء، عمر ضیاء اور فرحان علی کو اشتہاری قرار دے رکھا ہے۔

ذرائع کے مطا بق پراسیکیوٹر نیب نے مؤقف اپنایا کہ ملزموں نے پیراگون سوسائٹی میں سادہ لوح شہریوں سے 59 کروڑ کا فراڈ کیا اور اس سوسائٹی میں 50 کنال سے زائد سرکاری اراضی کو شامل کیا گیا،پیراگون ہائوسنگ سوسائٹی کے ڈائریکٹر قیصر امین بٹ وعدہ معاف گواہ بن چکے ہیں جبکہ اس سوسائٹی میں 93.6 فیصد شیئرز ہولڈر کے مالک خواجہ سعد، سلمان رفیق اور ندیم ضیاء ہیں۔

واضح رہے کہ خواجہ برادران کی پیشی کےبا عث احتساب عدالت کی سیکیورٹی سخت کی گئی جبکہ سیکرٹیریٹ چوک سے ایم اے او کالج چوک تک کنٹینرز اور خار دار تاریں لگا کر سڑک بند کر دیا گیا ۔