وزیر خارجہ شاہ محمود قریشی نے کہا ہے کہ پاکستان اور ارجنٹینا کے درمیان تجارت کے فروغ کیلئے مشترکہ کمیشن موجود ہے۔

تفصیلات کے مطابق پاکستان اور ارجنٹائن کے درمیان سفارتی تعلقات کی کی 70 ویں سالگرہ کے موقع پر وزیر خارجہ شاہ محمود قریشی اور ارجنٹائن کے سفیر لیپولڈو فرانسسکو ساہورس نے آج اسلام آباد کے ارجنٹینا پارک میں منعقدہ تقریب میں یادگاری پودے لگائے۔

اس موقع پر وزیر خارجہ شاہ محمود قریشی نے کہا کہ  پاکستان اور ارجنٹینا کے مابین گذشتہ 70 سالوں میں دو طرفہ تعلقات وسعت پذیر ہونے جو باہمی اعتماد ، احترام اور تعاون کا مظہر ہیں۔

وزیر خارجہ کا کہنا تھا کہ پاکستان اور ارجنٹینا کے درمیان تجارت کے فروغ کیلئے مشترکہ کمیشن موجود ہے۔ پاکستان اور ارجنٹینا کے درمیان دو طرفہ تعلقات کو مزید مضبوط بنانے کے لیے  ادارہ جاتی میکانزم کا کردار انتہائی اہم ہے۔

شاہ محمود قریشی کا یہ بھی کہنا تھا کہ20 مئی 2021 کو منعقد ہونے والی ہماری آخری میٹنگ کے دوران ،ہم نے زراعت ، دواسازی ، انفارمیشن ٹیکنالوجی اور صنعتی شعبوں پر مشترکہ ورکنگ گروپ بنانے پر اتفاق کیا تاکہ مستقبل میں تجارتی اور معاشی تعاون کو مزید فروغ دیا جا سکے۔

وزیر خارجہ نے کہا کہ ایک مشترکہ کاروباری کونسل بھی بزنس ٹو بزنس انٹریکشن بڑھانے کے لیے قائم کی گئی ہے ، دونوں ممالک کے درمیان دوطرفہ سیاسی مشاورت باقاعدگی سے ہوتی ہے۔

شاہ محمود قریشی نے یہ بھی کہا کہ ہماری پارلیمان میں پاکستان، ارجنٹینا فرینڈشپ گروپس کی موجودگی دو طرفہ پارلیمانی تعلقات کے استحکام کی علامت ہے۔

وزیر خارجہ کا کہنا تھا کہ موسمیاتی تبدیلیوں کی وجہ سے خطرہ اس بات کا ہے کہ پاکستان وسیع آبی وسائل کے حامل ملک سے، آبی وسائل کی دستیابی میں کمی والے ممالک میں شامل ہو سکتا ہے اور ان حالات میں شجر کاری کا فروغ ہی اہم حکمت ہے۔

وزیر خارجہ شاہ محمود قریشی کا مزید کہنا تھا کہ4 دسمبر کو ہم لاہور میں پاکستان اور ارجنٹینا کے مابین “پولو میچ” کا انعقاد کر رہے ہیں، میں آپ سب کی شرکت کا ممنون ہوں ۔

تقریب میں وفاقی وزیر سید فخر امام، وزیر مملکت برائے موسمیاتی تبدیلی محترمہ زرتاج گل، و دیگر اہم سیاسی و سماجی شخصیات نے شرکت کی۔