ربیع سیزن کیلئے وزیر فوڈ سکیورٹی سید فخر امام کی زیر صدارت فیڈرل کمیٹی آن ایگری کلچر کا اجلاس  ہوا۔

تفصیلات کے مطابق اجلاس میں وزیر زراعت پنجاب سید حسین جہانیاں گردیزی اور آزاد کشمیر کے وزیر زراعت سردار میر اکبر نے  شرکت  کی جبکہ اجلاس میں دیگر تمام صوبوں کے نمائندوں  نے بھی شرکت کی۔

جاری کردہ اعلامیے کے مطابق وزارت فوڈ سکیورٹی کمیٹی نے خریف کراپ 2021-22 پر بھی نظرثانی کی 2021-22 میں 1.9 ملین ہیکٹر سےکپاس کی 9.37 ملین بیلز پیداوار ہوگی جبکہ کپاس کی پیداوار میں 19.8 فیصد اضافہ ہوگا۔

 اعلامیے کے مطابق  گنے کی 1.27 ملین ہیکٹر رقبے سے 87.6 ملین ٹن پیداوار کا متوقع ہے، چاول کی پیداوار گزشتہ سال سے 5.8 فیصد اضافے کیساتھ 8.84 ملین ٹن پیداوار متوقع ہے جبکہ  مکئی کی پیداوار کا تخمینہ 9.0 ملین ٹن ہے۔

کمیٹی نے ربیع کی فصل میں گندم کا ٹارگٹ 28.9 ملین ٹن رکھا ہے، چنے 559 ہزار ٹن، آلو 6028 ہزار ٹن،پیاز کاہدف 2421 ہزار ٹن اور ٹماٹر کا ہدف 621 ہزار ٹن مقرر کیا گیا ہے۔

ربیع کیلئے ارسا ایڈوائزری کمیٹی نے 28 فیصد پانی کے شارٹ فال کا بتایا، ربیع کے سیزن میں یوریا اور ڈی اے پی کی فراہمی مستحکم رہے گی۔