توہین عدالت کیس میں معاون خصوصی فردوس عاشق اعوان نے غیر مشروط معافی مانگی جو کہ قبو ل کر لی گئی ہے۔

تفصیلات کے مطا بق اسلام آباد ہائیکورٹ کے چیف جسٹس اطہرمن اللہ نے فردوس عاشق کے خلاف توہین عدالت کیس کی سماعت کی۔

ذرائع کے مطا بق توہین عدالت کیس میں فردوس عاشق اعوان نے غیر مشروط معافی مانگ لی جبکہ جسٹس اطہر من اللہ نے ریمارکس دیئے کہ آپ عدالتی حکم کا انتظار کریں۔

فردوس عاشق اعوان کا کہنا ہے کہ میں آئندہ احتیاط کروں گی، میں غیر مشروط معافی کی طلب گار ہوں، میں عدلیہ توقیر میں کمی کا سوچ بھی نہیں سکتی، پاکستان کی تاریخ میں پہلی بار عدلیہ میں بہتری آرہی ہے، آپ بہت اچھے طریقے سے کام کررہے ہیں۔

چیف جسٹس ہائیکورٹ نے استفسار کیا آپ وزیراعظم کی معاون خصوصی ہیں ؟ وزیراعظم عدلیہ بحالی مہم میں پیش پیش تھے، 2 وجوہات کی بنیاد پر نوٹس جاری کیا، وزیر اعظم ہمیشہ رول آف لا کی بات کرتے ہیں، آپ نے زیر سماعت مقدمات پر اثر انداز ہونے کی کوشش کی، آپ نے عدلیہ کو سکینڈلائز کرنے کی کوشش کی، میرے بارے میں جو کہیں مجھے کوئی مسئلہ نہیں۔

عدالت نےمزید کہا کہ آپ سے ہرگز یہ امید نہیں تھی، ہائی کورٹ کے رولز پڑھ کر سنائیں جس پر فردوس عاشق اعوان نے ہائیکورٹ کے رولز پڑھ کر سنائے۔

چیف جسٹس ہائیکورٹ نے کہا کہ وزارت قانون نے نہیں بتایا تو ان وکلا سے پوچھ لینا تھا، مجھے اپنے ججز پر فخر ہے، ایک سال میں ریکارڈ کیسز نمٹائے، جس طرح آپ نے ہرزہ سرائی کی کہ کاش عام آدمی کیلئے بھی عدالت لگے، ہم تو بیٹھے ہی عام لوگوں کے لیے ہیں۔

چیف جسٹس ہائیکورٹ جسٹس اطہر من اللہ نے کہا کہ بہتر ہوتا آپ سیاست کو عدلیہ سے الگ رکھتیں، آپ ایک عام شخصیت نہیں، وزیراعظم کی معاون ہیں۔

چیف جسٹس ہائیکورٹ نے کہا کیا آپ کبھی ڈسٹرکٹ کورٹ گئیں ؟ صدر بار ایسوسی ایشن آپ کو ضلعی عدالتوں کا دورہ کرائیں، کبھی انتظامیہ کو ان عدالتوں کا خیال نہ آیا، ان عدالتوں میں عام لوگوں کے کیسز ہوتے ہیں، جا کر دیکھیں کچہری میں ججز کے لیے ٹوائلٹ تک نہیں، ہمارے فیصلے بولتے ہیں، وہی لوگوں کا اعتماد ہے، ہمارے فیصلے سے آدھے لوگ خوش ہوتے، آدھے ناراض ہیں۔

معاون خصوصی فردوس عاشق اعوان نے کہا کہ آپ کا عدلیہ تحریک میں بڑا کردار ہے۔

اس پر چیف جسٹس ہائیکورٹ جسٹس اطہر من اللہ نے کہا اُس بات کو آپ رہنے دیں یہاں، عدالت نے فیصلہ محفوظ کرلیا ہے جو کچھ دیر بعد سنایا جائے گا۔