ترجمان دفتر خارجہ عاصم افتخار کا کہنا ہے کہ سعودی عرب کی سلامتی اور امن کیلئے پاکستان ہمیشہ اس کے ساتھ ہے۔

تفصیلات کے مطابق ترجمان دفتر خارجہ عاصم افتخار نے اپنے بیان میں کہا ہے کہ سعودی عرب کے جزان ایئرپورٹ پر حوثی ملیشیاء کے ڈرون حملے کی شدید مذمت کرتے ہیں۔

عاصم افتخار نے کہا ہے کہ جزان کے شاہ عبداللہ ایئرپورٹ پر ڈرون حملے کے نتیجے میں لوگ زخمی اور املاک کو نقصان پہنچایا گیا، ایسے حملے نہ صرف عالمی قوانین کی خلاف ورزی بلکہ سعودی عرب اور علاقائی امن کیلئے خطرہ ہیں۔

ترجمان دفتر خارجہ عاصم افتخار نے مزید کہا ہے کہ پاکستان فوری طور پر ان حملوں کا سلسلہ بند کرنے کا مطالبہ کرتا ہے، سعودی عرب کی سلامتی اور امن کیلئے پاکستان ہمیشہ مملکت کے ساتھ ہے۔

واضح رہے کہ عرب میڈیا کے مطابق سعودی عرب میں جیزان شہر کے کنگ عبداللہ ایئرپورٹ پر حوثیوں نے ڈرون حملہ کیا جس کے نتیجے میں 5 افراد زخمی ہوئے۔

اتحادی فوج کے ترجمان ترکی المالکی کا کہنا تھا کہ زخمی افراد میں مختلف غیر ملکی شہری شامل ہیں جن کو اسپتال منتقل کردیا گیا ہے۔

ترجمان عرب اتحاد کا مزید کہنا تھا کہ حوثیوں کی شہریوں اور املاک کو نشانہ بنانے کی کوششیں جنگی جرائم ہیں، شہریوں کے تحفظ کے لیے مناسب آپریشنل اقدامات کیے جا رہے ہیں۔

عرب میڈیا کے مطابق عرب اتحاد نے جمعرات کو سعودی عرب کے جنوب مغربی شہر خمیس مشیت کی طرف آنے والے ایک بیلسٹک میزائل اور 2 ڈرون حملوں کو ناکام بنایا تھا۔