وہاب ریاض کی جار حانہ بیٹنگ نے سینٹرل پنجاب کو نیشنل ٹی ٹوئنٹی کپ کے سیمی فائنل میں پہنچا دیا ہے۔

تفصیلات کے مطابق ہوم سٹی سینٹرل پنجاب نے نیشنل ٹی ٹوئنٹی کے سیمی فائنل میں جگہ بنالی ہے،سنٹرل پنجاب نے ٹورنامنٹ کے اٹھائیسویں میچ میں بلوچستان کو 3 وکٹوں سے ہراکر ٹورنامنٹ کے سیمی فائنل میں جگہ بنائی جبکہ  بلوچستان کی ٹیم ٹورنامنٹ کے فائنل فور کی دوڑ سے باہر ہوگئی۔

وہاب ریاض کی 9 گیندوں پر 28 رنز کی برق رفتار اننگز نے سینٹرل پنجاب کو 163 رنز کا ہدف 11 گیندیں قبل حاصل کرنے میں اہم کردار ادا کیا۔

https://twitter.com/TheRealPCB/status/1447264099625209856

انہوں نے اننگز کے اٹھارویں اوور میں عماد بٹ کو لگاتار تین چھکے لگا کر میچ کا پانسہ پلٹ دیا۔

مطلوبہ ہدف کے تعاقب میں سینٹرل پنجاب کا آغاز بھی زیادہ متاثر کن نہ تھا محمد اخلاق کے علاوہ سینٹرل پنجاب کا کوئی بھی بیٹسمین  لمبی پارٹنرشپ لگانے میں کامیاب نہ ہوسکا۔

اوپنر محمد اخلاق نے 32 رنز بنائے،انہوں نے حسین طلعت کے ہمراہ دوسری وکٹ کے لیے 48 رنز کی شراکت قائم کی۔

فہیم اشرف نے 15 گیندوں پر 27 رنز بناکر سینٹرل پنجاب کو میچ میں واپس لانے کی بنیاد رکھی جسے بعدازاں وہاب ریاض نے دھواں دھار بیٹنگ سے فتح میں بدل دیا۔

بلوچستان کے عماد بٹ اور حارث سہیل نے 2،2 وکٹیں حاصل کیں۔

اس سے قبل بلوچستان نے عبداللہ شفیق کی نصف سنچری اور عماد بٹ کے تیزر فتار ناٹ آؤٹ 43 رنز کی بدولت مقررہ بیس اوورز میں 7 وکٹوں کے نقصان پر 162 رنز بنائے۔

دونوں بیٹسمین  نے چھٹی وکٹ کے لیے 46 رنز کی شراکت قائم کی، یہ بلوچستان کی اننگز کی طویل ترین پارٹنرشپ تھی۔

اوپنر عبداللہ شفیق نے 4 چھکوں اور 3 چوکوں کی بدولت 60 رنز کی اننگز کھیلی، انہیں ساتویں نمبر پر بیٹنگ کے لیے میدان میں اترنے والے عماد بٹ کے علاوہ کسی بھی بیٹسمین نےسپورٹ نہ کیا۔

عماد بٹ نے 27 گیندوں پر 3 چھکوں اور 2 چوکوں کی بدولت 43 رنزکی ناقابل شکست اننگز کھیلی، ان دونوں کے علاوہ بلوچستان کےڈبل فگرز میں داخل ہونے والے تیسرے بیٹسمین عمید آصف تھے، وہ 5 گیندوں پر 15 رنز بناکر اننگز کی آخری گیند پر آؤٹ ہوگئے۔

ثمین گل نے 20 رنز کے عوض 3 کھلاڑیوں کو آؤٹ کیا، محمد فیضان نے 2 جبکہ قاسم اکرم اور احمد صفی عبداللہ نے ایک ایک وکٹ حاصل کی۔

سینٹرل پنجاب کے ثمین گل کو پلیئر آف دی میچ قرار دیا گیا۔

ٹورنامنٹ کے اٹھائیسویں میچ کے بعد ناردرن اور سینٹرل پنجاب کے پوائنٹس کی تعداد 12،12 ہوگئی ہے۔

خیبرپختونخوااور سندھ کی ٹیمیں 10، 10 پوائنٹس کے ساتھ بالترتیب تیسرے اور چوتھے نمبر پر موجود ہیں۔

بلوچستان کا پوائنٹس ٹیبل پر پانچواں اور سدرن پنجاب کا چھٹا نمبر ہے۔