صوبائی وزیر صنعت وتجارت میاں اسلم اقبال نے اعلان کیا کہ پنجاب حکومت صوبے میں 9 سپیشل ٹیکنالوجی زون بنائے گی، پہلا اسٹیٹ آف دی آرٹ ٹیکنالوجی زون ٹیوٹا سیکرٹریٹ میں بنے گا۔

تفصیلات کے مطابق صوبائی وزیر صنعت وتجارت میاں اسلم اقبال نے اس بات کا اعلان آج ایوان وزیر اعلیٰ میں ”وزیر اعلیٰ سرمایہ کاری سہولت سینٹر“ کی افتتاحی تقریب سے خطاب کرتے ہوئے کیا۔ وزیر اعلیٰ پنجاب سردار عثمان بزدار تقریب کے مہمان خصوصی تھے۔

اس کے علاوہ صوبائی وزراء، اراکین اسمبلی، چینی اور پاکستانی سرمایہ کاروں نے تقریب میں شرکت کی۔

صوبائی وزیر نے کہا کہ پنجاب پاکستان کا ٹیکنالوجی زون بنانے والا پہلا صوبہ ہوگا اور یہ اسپیشل ٹیکنالوجی پارک صوبے کے 9 ڈویژنوں میں بنیں گے۔

انہوں نے کہا کہ پنجاب حکومت نے سرمایہ کاروں کو سہولت کی فراہمی کے لئے ”وزیر اعلیٰ سرمایہ کاری سہولت سینٹر“ قائم کر کے سرمایہ کاری کے فروغ کا ایک اور سنگ میل عبور کر لیا ہے۔

میاں اسلم اقبال نے کہا کہ وزیر اعظم کے ویژن کے مطابق وزیر اعلیٰ پنجاب کی قیادت میں سرمایہ کاری کے فروغ کے لئے تاریخ ساز اقدامات کیے گئے ہیں۔

انہوں نے کہا کہ وزیر اعلیٰ نے صوبائی وزراء کو اپنے محکموں میں اصلاحات لانے کے لئے مکمل بااختیار بنایا ہے، کاروبار میں آسانیاں پیدا کرنے اور سرمایہ کاروں کو سہولت کی فراہمی کے لئے تمام ٹیکسوں کو یکجا کیا جارہا ہے۔

میاں اسلم اقبال نے کہا کہ صوبے میں انسپکٹر لیس رجیم متعارف کروایا گیا ہے اور فیکٹریوں میں بوائلر کی انسپکشن کا تھرڈ پارٹی نظام لایا گیا ہے، پنجاب روزگار اسکیم کے تحت کورونا سے متاثرہ کاروبار کی بحالی اور نیا کاروبار شروع کرنے کے لئے پنجاب روزگار اسکیم کے تحت ایک کروڑ روپے تک کے آسان قرضے دیئے جارہے ہیں۔

صوبائی وزیر صنعت وتجارت میاں اسلم اقبال نے مزید کہا کہ صوبے میں 9 اسپیشل اکنامک زون بنائے گئے ہیں جہاں نئے صنعتی یونٹس لگ رہے ہیں، صوبے میں نئی اسمال انڈسٹریل اسٹیٹس بھی بنائی جارہی ہیں۔