صوبائی وزیر جامعات سندھ اسماعیل راہو کا کہنا ہے کہ پیٹرول مصنوعات کی قیمتوں میں اضافہ فورن واپس لیا جائے۔

تفصیلات کے مطابق صوبائی وزیر جامعات سندھ اسماعیل راہو نے پیٹرول مصنوعات کی قیمتوں میں اضافے پرردعمل دیتے ہوئے کہا کہ کوئی دن ایسا نہیں ہوتا جب تباہی سرکار کوئی نہ کوئی عوام پر مہنگائی کا بم نہیں گراتی۔

صوبائی وزیر کا کہنا ہے کہ حکومتی ترجمان بتائیں کہ جن ملکوں میں پیٹرول مہنگا مل رہا ہے وہاں کے لوگوں کی آمدنی کتنی ہے؟ پاکستان سے سستا پیٹرول وینزویلا اور ایران میں عوام کو مل رہا ہے، عمران خان حکومت عوام کو بےدردی سے لوٹ رہا ہے۔

انہوں نے کہا کہ وینزویلا میں اس وقت پیٹرول تقریباً 3 روپے 36 پیسے فی لیٹر (پاکستانی روپے میں) فروخت ہورہا ہے، پیٹرول مصنوعات میں اضافے سے مہنگائی کا مزید طوفان آئے گا، پیٹرول کی قیمت میں 10 روپے 49 پیسے کا اضافہ حکومتی نااہلی اور بے حسی ہے۔

‏ اسماعیل راہو نے کہا ہے کہ عمران خان کو غریب عوام کا سوچنا چاہیے ناکہ مافیاز کے لئے، پیٹرولیم مصنوعات کی قیمتوں میں اضافے سے ملک کا نقصان ہے، تبدیلی سرکار عوام کے لیے وبال جان بن گئی ہے، موجودہ حکومت فوراً مستعفیٰ ہوجائے، مہنگائی پر کنٹرول کرنے میں ناکام ہوچکی ہے، حکومت پیٹرول کی ٹیکسز کم کرے اور عوام کو رلیف دے۔

صوبائی وزیر جامعات سندھ اسماعیل راہو نے مزید کہا ہے کہ پیٹرول مصنوعات میں اضافے سے زرعی اجناس بھی مہنگی ہوں گی، کھاد اور یوریا کی قیمتوں میں بھی اضافہ ہوگا۔