چوکوں اور چھکوں کی برسات میں ٹی ٹوئنٹی ورلڈ کپ کا میلہ کل سجے گا،افتتاحی تقریب میں گھوڑے کی پشت پر ٹرافی پچ پر آئے گی۔

تفصیلات کے مطابق 17اکتوبر سے پہلا مرحلہ عمان میں کھیلا جائیگا ، سپر12دوسرا مرحلہ 23اکتوبر سے یو اے ای میں شروع ہوگا،پہلے مرحلے میں 8ٹیمیں گروپ میچز کھیلیں گی ، 4ٹیمیں دوسرے مرحلے کے لیے کوالیفائی کریں گی۔

میگا ایونٹ کا سب سے بڑا پاک بھارت مقابلہ24اکتوبر کو ہوگا، پاکستانی ٹیم اپنا پہلا وارم اپ میچ 18اکتوبر کو ویسٹ انڈیز اور دوسرا وارم اپ میچ 20اکتوبر کوجنوبی افریقہ کیخلاف کھیلے گی۔

 17اکتوبر کو گروپ میچز کا پہلا میچ اومان اور پاپوا نیوگنی کے درمیان کھیلا جائے گا۔

 اولمپکس اور فیفا ورلڈ کپ کے برعکس اس تقریب میں چکاچوند کے بجائے عمانی خواتین کو خراج تحسین پیش کیا جائے گا۔

عمان کرکٹ کے چیئرمین پنکج کھیم جی نے کہاکہ ہم ٹی ٹوئنٹی ورلڈ کپ کی افتتاحی تقریب پر خصوصی شو کی پلاننگ کررہے ہیں، عام طور پر بڑے اسپورٹس ایونٹس کی تقاریب کو گلیمر کا تڑکا لگایا جاتا ہے مگر یہ کرکٹ ورلڈ کپ ہے، ہم نے آئی سی سی کو مختصر افتتاحی تقریب کیلئے راضی کرلیا ہے۔

انہوں نے کہا کہ خوش قسمتی سے17اکتوبر عمان کا یوم خواتین ہے، ہم نے اس موقع کی مناسبت سے عمانی خواتین کو خراج تحسین پیش کرنے کا فیصلہ کرلیا،اسی حوالے سے پروگرام بھی ترتیب دیے گئے ہیں۔

 تقریب میں عمان کے کلاسیکل میوزک کے ساتھ ویسٹرن اور بالی ووڈ گانے بھی بجائے جائیں گے، تقریب میں ٹیٹوئنٹی ورلڈ کپ کا ترانہ پیش کیا جائے گا،مجموعی طور پر یہ تقریب 20منٹ پر محیط ہوگی۔

تقریب میں بادشاہی اصطبل کے 20 گھوڑے باؤنڈری کے قریب رہیں گے، ان پر 16خواتین رائیڈرز سوار ہوں گی۔

پنکج کھیم جی نے کہاکہ ہم ایک گھوڑے کی پشت پر روایتی عمانی اسٹائل میں ٹرافی کو پچ پر لانے کی منصوبہ بندی بھی کررہے ہیں۔

دوسری جانب انٹرنیشنل کرکٹ کونسل نے ٹی ٹوئنٹی ورلڈکپ کی انعامی رقم کا اعلان کردیا ہے۔

 فاتح ٹیم کو 16لاکھ ڈالرز ملیں گے، رنرز اپ 8لاکھ جبکہ سیمی فائنل میں شکست کھانے والی ٹیمیں چار چار لاکھ ڈالرز کی حقدار ٹھہریں گی۔ٹیموں کے گروپ میچز جیتنے کی رقم علیحدہ ہوگی۔

اگر پاکستانی ٹیم گروپ میں ناقابل شکست رہتے ہوئے ورلڈکپ جیتتی ہے تو وہ 32 کروڑ روپے کمالے گی۔

ٹی ٹوئنٹی ورلڈ کپ میں 24اکتوبر کو پاکستان کا مقابلہ انڈیا کیساتھ دبئی انٹرنیشنل کرکٹ سٹیڈیم میں ہو گا،26اکتوبر کو پاکستان بمقابلہ نیوزی لینڈ،شارجہ کرکٹ سٹیڈیم،29اکتوبر کو پاکستان بمقابلہ افغانستان، دبئی،2نومبر کو پاکستان بمقابلہ اے ٹو ابوظہبی،7 نومبر کو پاکستان بمقابلہ بی ون،شارجہ میں کھیلا جائیگا۔

10نومبر کو پہلا سیمی فائنل ابوظہبی،11نومبر کو دوسرا سیمی فائنل دبئی جبکہ 14نومبرکوفائنل دبئی انٹرنیشنل کرکٹ سٹیڈیم میں کھیلا جائیگا۔