سابق وزیر اعظم آزاد جموں کشمیرسردار عتیق احمد خان نے کہا ہے کہ بھارت نے عالمی دنیا کو مسئلہ کشمیر کے حوالے سے گمراہ کیا  ہے۔

تفصیلات کے مطابق سابق وزیر اعظم آزاد جموں کشمیر سردار عتیق احمد خان نے سیمینار سے اظہار خیال کرتے ہوئے کہا کہ بھارتی فوج کشمیر میں ناکام ہوگئی ہے، کشمیر میں بھارت کے تمام حربے ناکام ہوگئے۔

سردارعتیق احمد خان  نے کہا کہ مقبوضہ کشمیر کے عوام کے ساتھ اظہار یکجہتی پر بلوچستان کے عوام کا شکریہ ادا کرتا ہو , جلسہ و سیمینار کے انعقاد سے مسئلہ کشمیر اجاگر ہوگا۔

سردارعتیق احمد خان نے یہ بھی کہا کہ کشمیر میں آج نوے دن سے  پورا نظام زندگی متاثر و مفلوج ہے،اسپتال اسکول بازار بند ہیں، کشمیریوں کا ہتھیار پاکستان کے ساتھ جذبات و محبت ہے۔

سابق وزیر اعظم آزاد جموں کشمیر سردار عتیق احمد خان نے مزید کہا کہ کشمیرعلاقائی نظریاتی سمیت ہراعتبار سے پاکستان کا حصہ ہے، کشمیر یوں کے دل پاکستان کے ساتھ دھڑکتے ہیں اور پاکستان کی فوج نے دہشت گردی کے خلاف جنگ میں کامیابی حاصل کی ہے۔

واضح رہے کہ مقبو ضہ وادی میں قابض بھارتی فوج ظلم کے پہاڑ توڑ رہی ہے، نہتے کشمیری 91روزسے گھروں میں قید ہیں،بھارتی سپریم کورٹ کے حکم کے باوجود مقبوضہ وادی میں آج بھی نظام زندگی مفلوج ہے اور حالات معمول پر لانے کے لئے بھارتی حکومت نے سپر یم کو رٹ کے حکم پر عمل در آمد کر تے ہوئے مقبو ضہ کشمیر میں کوئی مثبت قدم نہیں اٹھایا۔

مقبوضہ کشمیر میں مسلسل کرفیوکے باعث مواصلات کا نظام مکمل پر معطل ہے، قابض انتظامیہ نے ٹیلی فون سروس بند کررکھی ہے جبکہ ذرائع ابلاغ پرسخت پابندیاں عائد ہیں۔

کشمیرمیڈیا سروس کے مطابق وادی میں کرفیو کے باعث 3 ہزار 9 سو کروڑسے زائد کا نقصان ہو چکا ہے، وادی میں کھانا میسر ہے اور نہ ہی دوائیں، سرینگر اسپتال انتظامیہ کے مطابق کرفیو کے باعث روزانہ متعدد مریض لقمہ اجل بن جاتے ہیں۔

یاد رہے کہ پانچ اگست کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل 370 اے کو ختم کردیا تھا۔