پاکستان پیپلزپارٹی کے چیئرمین بلاول بھٹو زرداری نے کہا ہے کہ کراچی شہر کی ترقی میں تسلسل کے حوالے سے کوئی رکاوٹ برداشت نہیں کروں گا۔

تفصیلات کے مطابق پاکستان پیپلزپارٹی کے چیئرمین بلاول بھٹو زرداری سے کراچی کے ایڈمنسٹریٹر مرتضیٰ وہاب کی بلاول ہاؤس میں ملاقات ہوئی جس میں ایڈمنسٹریٹر کراچی مرتضی وہاب نے چیئرمین بلاول بھٹو زرداری کو شہر قائد میں جاری ترقیاتی کاموں کی تفصیل سے آگاہ کیا۔

ملاقات میں پیپلزپارٹی کے چیئرمین بلاول بھٹو زرداری نے کراچی میں جاری ترقیاتی کاموں کی جلد تکمیل کے حوالے سے بھی خصوصی ہدایات دیں۔

  بلاول بھٹو زرداری نے ایڈمنسٹریٹر کراچی کو ہدایت دیتے ہوئے کہا  کہ کیماڑی سے سہراب گوٹھ تک کراچی کے ہر علاقے پر خصوصی توجہ دی جائے۔

پاکستان پیپلزپارٹی کے چیئرمین بلاول بھٹو زرداری نے  مزید کہا کہ کراچی کی انتظامیہ کی جانب سے انتہائی قلیل مدت میں دیرپا مسائل کا فوری حل ایک اچھی ابتدا ہے، کراچی شہر کی ترقی میں تسلسل کے حوالے سے کوئی رکاوٹ برداشت نہیں کروں گا۔

دوسری جانب  چیئرمین پیپلز پارٹی بلاول بھٹو زرداری سے پی پی پی سندھ کے جنرل سیکریٹری وقار مہدی کی ملاقات بلاول ہاؤس کراچی میں ہوئی۔

چیئرمین بلاول بھٹو زرداری اور پی پی پی رہنما وقار مہدی کے درمیان سندھ کی سیاسی صورت حال پر تبادلہ خیال کیا گیا۔

ملاقات میں چیئرمین بلاول بھٹو زرداری نے وقار مہدی نے ووٹر لسٹوں کے اندراج کے حوالے سے شروع ہونے والی حکومتی سرگرمی کی صورت حال سے آگاہ کیا۔

اس موقع پر پاکستان پیپلزپارٹی کے چیئرمین بلاول بھٹو زرداری نے کہا کہ یوم شہدائے کارساز کے حوالے سے جلسے میں سندھ بھر سے عوام کو موبلائز کرنے کا عمل قابل تحسین ہے۔

ملاقات میں پاکستان پیپلزپارٹی کے چیئرمین بلاول بھٹو زرداری نے ہدایت کی کہ کراچی کے ہر ضلع میں مہنگائی کے خلاف احتجاجی مظاہرے کئے جائیں اور کراچی میں گراس روٹ سطح تک تنظیم سازی جلد از جلد مکمل کی جائے۔