وزیر خارجہ مخدوم شاہ محمود قریشی کا کہنا ہے کہ  مقبوضہ کشمیر کے حوالے سے ملائیشیا کا موقف قابل ستائش ہے۔

تفصیلات کے مطابق وزیر خارجہ شاہ محمود قریشی کی دورہ ملائیشیا کے دوران اپنے ہم منصب سیف الدین عبداللہ سے ملاقات ہوئی۔

ملاقات میں دو طرفہ تعلقات، اقتصادی و تجارتی تعاون کے فروغ سمیت باہمی دلچسپی کے امور پر تبادلہ خیال کیا گیا۔

اس موقع پر وزیر خارجہ نے کہا کہ ہم کشمیر کے مسئلے پر ملائیشیا  کی طرف سے پاکستانی موقف کی غیر متزلزل اور بھرپور حمایت کا خیر مقدم کرتے ہیں ۔یہ امر بھی قابل ستائش ہے کہ ملائیشیا نے بھارتی دھمکیوں کو خاطر میں نہ لاتے ہوئے مقبوضہ جموں و کشمیر کے حوالے سے اپنا اصولی موقف برقرار رکھا ۔

انہوں نے مزید کہا کہ پاکستان اور ملائشیا کے مابین دیرینہ  اور گہرے دوستانہ مراسم  ہیں ۔

شاہ محمود قریشی کا کہنا تھا کہ تعمیر و ترقی کے یکساں اہداف کے حصول اور  باہمی تعاون کے فروغ میں دونوں ممالک کے مابین اقتصادی تعاون انتہائی سود مند اور معاون ثابت ہو گا ۔

وزیر خارجہ نے کہا کہ رواں سال  پاکستان کے قومی دن کے موقع پر ملائشیا  کے وزیر اعظم ڈاکٹر مہاتیر محمد کے دورہ پاکستان کی خوشگوار یادیں ابھی تک لوگوں کے دلوں میں تازہ ہیں ۔

ملاقات کے دوران دونوں وزرائے خارجہ  نےتجارت،تعلیم، ٹیکنالوجی اور انفراسٹرکچر ڈویلپمنٹ سمیت مختلف شعبوں میں دو طرفہ تعاون کے فروغ پر اتفاق کیا۔

ملائشیا کے وزیر خارجہ سیف الدین عبداللہ نے ملائشیا کا دورہ کرنے پر وزیر خارجہ مخدوم شاہ محمود قریشی کا شکریہ ادا کیا۔ملائشین وزیر خارجہ نے وزیر خارجہ کے اعزاز میں ضیافت کا اہتمام  بھی کیا۔