سابق وزیراعظم نوازشریف کو 16 روز بعد لاہور کے سروسز ہسپتال سے ڈسچارج کر دیا گیا ہے،مریم نواز بھی اپنے والد کے ہمراہ وہاں سے روانہ ہو گئی ہیں۔

تفصیلات کے مطا بق نوازشریف کو گزشتہ روزسروسز اسپتال سے ڈسچارج کر دیا گیا تھا تاہم مریم نواز کی رہائی کیلئے روبکار جاری نہ ہونے پر نوازشریف نے رات سروسز اسپتال میں ہی گزاری۔

مسلم لیگ ن کی تر جمان مریم اورنگزیب کا کہنا ہے کہ جاتی امرا میں نواز شریف اپنے گھر پر علاج کرائیں گے،ان کی رہائش گاہ پر خصوصی میڈیکل یونٹ بنادیا گیا ہے۔

مریم اورنگزیب نے مزید بتا یا کہ نواز شریف کی حالت نازک ہے، ڈاکٹرز نے ملاقاتوں پر پابندی اورسخت حفاظتی تدابیر اختیار کرنے کی ہدایت کی ہے۔

لیگی رہنما کا کہنا تھا کہ ڈاکٹرعدنان کی زیر نگرانی شریف میڈیکل سٹی ہسپتال نے نواز شریف کی رہائش گاہ پر انتہائی نگہداشت یونٹ قائم کیا ہے، آئی سی یو میں ڈاکٹرز 24 گھنٹے موجود رہیں گے۔

نواز شریف کی سروسز ہسپتال سے منتقلی کے موقع پر لیگی کارکن بھی ہسپتال کے باہر موجود تھے، نوازشریف ہسپتال کی عمارت سے نکل کر خود چل کر باہر آئے اور ایمبولینس میں بیٹھے،نوازشریف کو دیکھتے ہی لیگی کارکنان نے پھولوں کی پتیاں نچھاور کیں۔

ذرائع کے مطا بق نواز شریف کی سروسز ہسپتال سے منتقلی کا فیصلہ شہباز شریف، ذاتی معالج ڈاکٹرعدنان کی دیگرڈاکٹرز سے مشاورت کے بعد ہوا ہے۔

مریم نواز کی احتساب عدالت سے رہائی کی روبکار جاری ہونے کے بعد ضمانت پر رہا کیا گیا، جیل عملے نے ہسپتال جا کر مریم نواز سے دستخط کروائے انہیں چودھری شوگر ملز کیس میں ضمانتی مچلکوں کے عوض ضمانت ملی ۔

سابق وزیراعظم نواز شریف کے ذاتی معالج ڈاکٹر عدنان نے سماجی رابطوں کی ویب سائٹ ٹویٹر پر جاری بیان میں بتایا کہ مریم نواز کی رہائی میں غیر معمولی تاخیر ہوئی، جس وجہ سے نواز شریف نے ان کے بغیر ہسپتال چھوڑنے سے انکار کر دیا ہے۔

Advertisement

Amidst unprecedented & unusual delay in #MaryamNawaz release, former PM #NawazSharif refused to leave hospital without Maryam.
All arrangements were in place for MNS to be shifted to Sharif Medical City Hospital today.
He waited all day for the release order!#ReleaseMaryamNOW

— Dr. Adnan Khan (#StayHomeSaveLives) (@Dr_Khan) November 5, 2019

ڈاکٹر عدنان نے ٹویٹ میں مزید کہا کہ نواز شریف کو شریف میڈیکل سٹی ہسپتال منتقل کرنے کے لئے تمام انتظامات کر لئے گئے تھے، مگر وہ سارا دن مریم نواز کی رہائی کے آرڈر کا انتظار کرتے رہے۔

نواز شریف کے ذاتی معالج ڈاکٹر عدنان کے مطابق نواز شریف کی حالت تشویشناک ہے۔