وفاقی وزیر برائے صنعت و پیداوار مخدوم خسرو بختیار نے کہا ہے کہ خواتین کو بااختیار بنانا پاکستان کے آئین کا حصہ ہے۔

تفصیلات کے مطابق وفاقی وزیر برائے صنعت و پیداوار مخدوم خسرو بختیار نے میڈیا سے گفتگو کرتے ہوئے کہا ہے کہ پی ٹی آئی حکومت زندگی کے تمام شعبوں میں خواتین کے مرکزی کردار کو یقینی بنانے کے لئے پرعزم ہے۔

وفاقی وزیر برائے صنعت و پیداوار نے کہا کہ پاکستان میں خواتین کی حوصلہ افزائی کی جارہی ہے کہ وہ قومی زندگی کے ہر شعبے، بشمول سیاست میں کلیدی کردار ادا کریں، آج کے پاکستان میں ماضی کی نسبت ایک بڑی تعداد میں لڑکیاں اعلیٰ تعلیم حاصل کر رہی ہیں اور پیشہ ورانہ شعبوں سے منسلک ہیں۔

خسرو بختیار نے یہ بھی کہا کہ پاکستان ہنر مند کارکنوں، تسلیم شدہ ادارے اور مواقع سے متعلق ڈیٹا کی معلومات رکن ممالک کے درمیان شیئر کرنے اور خواتین تارکین وطن کارکنوں کی شرکت کو بڑھانے کے لیے کوششوں کو آگے بڑھائے گا۔

وفاقی وزیر برائے صنعت و پیداوار کا کہنا تھا کہ وزیراعظم عمران خان کی حکومت نے اوورسیز پاکستانیوں کی فلاح و بہبود پر خصوصی توجہ دی ہے اور اس کے لئے بہت سی پالیسی اصلاحات متعارف کرائی ہیں۔

خسرو بختیار کا یہ بھی کہنا تھا کہ ہمارے تارکین وطن کارکن ہماری قوم کے لئے باعث فخر بنیں گے اور انہیں یو اے ای اور پاکستان  کے درمیان ایک موثر پل سمجھا جاتا ہے۔

وفاقی وزیر برائے صنعت و پیداوار نے متحدہ عرب امارات کی قیادت کی تعریف کی اور کہا کہ پاکستان اپنی مدت سربراہی میں ایک موثر ایکشن پلان بنانے کی پوری کوشش کرے گا جس کی بنیاد پہلے سے رکھی گئی ہے۔

خسرو بختیار نے علاقائی تعاون کے ایک نئے دور کے لئے پاکستان کا وژن واضح کرتے ہوئے کہا کہ پاکستان قانونی نقل مکانی، عالمگیر مہارت کی ترقی اور سرٹیفیکیشن کے ساتھ ساتھ ملازمت اور کارکنوں کے سماجی تحفظ کے لیئے خصوصی توجہ دے گا۔

وفاقی وزیر برائے صنعت و پیداوار نے نئے تقاضوں کو پورا کرنے کے لئے دستیاب افرادی قوت  کی استعداد میں اضافے پر خصوصی توجہ دینے کی ضرورت پر زور دیا۔

خسرو بختیار کا یہ بھی کہنا تھا کہ ابوظہبی ڈائیلاگ رکن ممالک کے درمیان خیالات کے تبادلے کے ساتھ ساتھ بہترین طریقوں کے اشتراک کا ایک اہم پلیٹ فارم ہے، ابوظہبی ڈائیلاگ نے مزدوروں کے حقوق کے تحفظ میں  ایک نمایاں کردار  ادا کیا ہے۔

وفاقی وزیر برائے صنعت و پیداوار مخدوم خسرو بختیار نے دوطرفہ شراکت داری قائم کرنے میں “ابوظہبی ڈائیلاگ  کی اہمیت” کو اجاگر کرتے ہوئے کہا کہ یہ ایک کثیر جہتی فورم ہے اور دوطرفہ علاقائی تعاون اور شراکت داری کی بھرپور حوصلہ افزائی کرتا ہے۔