بول نیوز کے اینکر مرید عباس کی بیوہ زارا عباس نے کہا ہے کہ ہمارے ساتھ ظلم ہوا ہم آج بھی انصاف کے لیے در در کی ٹھوکریں کھانے پر مجبور ہیں۔

تفصیلات کے مطابق مرید عباس کی بیوہ زارا عباس نے اپنے ایک ویڈیو پیغام میں کہا ہے کہ 9 نومبر کو میرے شوہر اور خضر حیات کو قتل ہوئےچاہ ماہ مکمل ہوں گے۔

زارا عباس کا کہنا تھا کہ فرعون عاطف زمان اور عادل زمان نے میرے شوہر اور خضر حیات کی زندگی چھین لی اور دونوں ملزمان عدالتوں میں کھلے عام سیگریٹ نوشی کرتے ہیں جبکہ ملزمان کی جانب سے گواہ عمر ریحان کو اور مجھے دھمکیاں بھی موصول ہوئی ہے۔

زارا عباس کا یہ بھی کہنا تھا کہ ظالم نہیں چاہتے کہ اس کیس کی میڈیا کوریج ہو اور سچائی لوگوں تک پہنچائی جائے یا مظلوموں کو انصاف ملے اس لئے کیس کی کوریج کرنے والے صحافی کو عدالت میں زدوکوب کیا گیا، موبائل فون چھین کر ویڈیوز ڈیلیٹ کرائی گئیں۔

مرید عباس کی بیوہ زارا عباس نے اپنے ویڈیو پیغام میں صحافیوں سے درخواست کرتے ہوئے کہا کہ سٹی کورٹ میں بدھ کے روز میں پیش ہوں گی، میڈیا بھی ملزمان کی پیشی کی کوریج کے لیے عدالت آئے۔

واضح رہے کہ 9 جولائی کو کراچی کے علاقے ڈیفنس میں پیسوں کے لین دین کے تنازع پر ملزم عاطف زمان نے بول نیوز کے اینکرمرید عباس اوران کے دوست کو فائرنگ کر کے قتل کر دیا تھا۔

یاد رہے کہ 5 اگست کو اینکر مرید عباس قتل کیس میں ان کی اہلیہ اور سول سوسائٹی نے کا پریس کلب کے باہرمظاہرہ میں ملزم عاطف زمان کو پھانسی دینے کا مطالبہ کردیاتھا۔ مظاہرین نے پریس کلب کے با ہر ملزم عاطف زمان کو پھانسی دو کے نعرے بھی لگائے تھے۔