پاکستان شوبز انڈسٹری کی معروف اداکارہ مہوش حیات نے اسکرین سے دوری اختیار کرنے کی اصل وجہ بتا دی۔

اداکارہ نے اپنے ایک حالیہ انٹرویو میں اپنے لیے کرداروں کے انتخاب کرنے کے طریقے کے بارے میں بتایا کہ انہیں لگتا ہے کہ اب وہ اپنے انتخاب میں بہت زیادہ سمجھدار ہو گئی ہیں ۔

انہوں نے کہا کہ دل لگی ڈرامے کے بعد کوئی ٹی وی ڈرامہ اس لئے نہیں کیا کیونکہ ان دنوں تمام کردار تقریباً ایک ہی طرح کے تصور پر مبنی ہیں۔

مہوش حیات کا کہنا ہے کہ انہیں ایک اداکارہ کے طور پر اپنے آپ کو چیلنج کرنے کی ضرورت ہے اور ابھی انہیں ایسا کوئی پراجیکٹ نظر نہیں آیا۔

انہوں نےعالمی وباء کورونا وائرس سے پاکستانی شوبز انڈسٹری پر پڑنے والے اثرات کے بارے میں بات کرتے ہوئے کہا کہ اس مرض نے ہمیں ایک اچھا موقع فراہم کیا ہے کہ ہم ایک بار جائزہ لیں اور سنجیدگی سے اس بات پر دوبارہ غور کریں کہ پاکستانی سینما کو کتنا کامیاب ہونا چاہئیے۔

مہوش حیات کا کہنا تھا کہ کچھ بڑی فلمیں تیار ہیں لیکن انہیں تشویش ہے کہ کیا پچھلے چند سالوں کے دوران انٹرٹینمنٹ کے حوالے سے دنیا بھر میں رجحان تبدیل ہوگیا ہے اور کیا سامعین اب سینما جانے کے بجائےگھروں میں ہی دستیاب انٹرٹینمنٹ کے مواد کی وسیع اقسام کو دیکھتے ہیں۔

انہوں نے کہا کہ وہ نہیں جانتیں کہ ہمارے پاس موجود فلمیں سامعین کو دوبارہ سینما گھروں کی طرف راغب کرنے کے لئے کافی ہیں لیکن وہ پھر بھی پر امید ہیں۔

مہوش حیات آخر میں کہا کہ اس صنعت کو حاصل کرنے میں ہم نے جو محنت کی ہے اسے کھو دینا شرم کی بات ہوگی۔