وزیراعظم آزاد کشمیر سردار عبد القیوم نیازی نے کہا ہے کہ حکومت عوام کو ان کی دہلیز پر بنیادی سہولیات فراہم کرنے کیلئے سرگرم ہے۔

عبد القیوم نیازی کی زیر صدارت رابطہ کونسل برائے لوکل گونمنٹ و دیہی ترقی کا اجلاس ہوا جس میں عبد القیوم نیازی کو سیکرٹری لوکل گورنمنٹ اعجاز منیر نے رابطہ کونسل برائے محکمہ لوکل گورنمنٹ و دیہی ترقی کے تحت جاری منصوبہ جات پر بریفنگ دی گئی۔

اجلاس کی صدارت کرتے ہوئے وزیراعظم آزاد کشمیر نے   کہا کہ حکومت عوام کو ان کی دہلیز پر بنیادی سہولیات فراہم کرنے کیلئے سرگرم ہے، عوام کو بنیادی سہولیات ان کی دہلیز پر مہیا کر کے ان کا معیار زندگی بلند کریں گے۔

عبد القیوم نیازی نے  ہدایت دی کہ کمیونٹی انفراسٹریکچر پروگرام کے تحت جملہ منصوبہ جات کی بروقت تکمیل یقینی بنائی جائے جبکہ گاؤں کی سطح پر کچے راستوں اور پگڈنڈیوں کی تعمیر کو بھی شامل کیا جائے۔

 ان  کا کہنا تھا کہ کمیونٹی انفراسٹریکچر پروگرام کے تحت ہر علاقے میں اس کی ضرورت کے مطابق بلاتحصیص بنیادی ضرورت کے منصوبے شروع کریں گے۔

وزیراعظم آزاد کشمیر سردار عبد القیوم نیازی  کا  مزید کہنا تھا کہ پی ایم سی آئی ڈی پی سے مختلف شعبہ جات کی ضرورت کے مطابق فنڈز فراہم کیے جائیں گے ۔

اجلاس میں وزیر لوکل گورنمنٹ خواجہ فاروق، سیکرٹری لوکل گورنمنٹ اعجاز احمد خان ، سیکرٹری محکمہ ترقیات و دیگر متعلقہ حکام نے شرکت کی۔