قومی احتساب بیورو(نیب) کو آمدن سے زائد اثاثہ جات کیس میں سابق وزیر خزانہ اسحاق ڈار کی جائیداد نیلامی کی اجازت مل گئی۔

تفصیلات کے مطابق لاہور کی احتساب عدالت کے جج محمد بشیر نے سابق وزیر خزانہ و مسلم لیگ ن کے رہنما اسحاق ڈار کی اہلیہ تبسم اسحاق ڈارکی جانب سے دائر کی گئی درخواست پر محفوظ شدہ فیصلہ سنا دیا۔

احتساب عدالت نے نیب کی جانب سے مسلم لیگ ن کے رہنما اسحاق ڈار کی جائیداد کی نیلامی روکنے کی درخواست مستردکرتے ہوئےنیب کو جائیداد نیلام کرنے کی اجازت دے دی ہے۔

واضح رہے کہ اسحاق ڈار کی اہلیہ تبسم اسحاق ڈار نے نیب کی جانب سے اسحاق ڈار کی جائیداد قرقی کو چیلنج کیا تھا۔تبسم اسحاق ڈار کا موقف تھا کہ اسحاق ڈار نے لاہور کی جائیداد انہیں تحفے میں دی تھی۔

تاہم تبسم اسحاق ڈار جائیداد تحفے میں ملنے کا کوئی ثبوت احتساب عدالت میں پیش نہ کرسکیں۔

یاد رہے کہ اس سے قبل انٹر پول نے حکومتِ پاکستان کی درخواست پر سابق وزیرِخزانہ اسحاق ڈار کی گرفتاری کے لیے ریڈ نوٹس جاری کرنے سے انکار کر دیا تھا اور انہیں کلین چٹ دیتے ہوئے ڈیٹا حذف کرنےکی ہدایت کر دی تھی۔

سابق وزیرِ خزانہ نے انٹر پول کو ثبوت فراہم کرتے ہوئے بتایا تھا کہ پی ٹی آئی حکومت مجھے سیاسی انتقام کا نشانہ بنا رہی ہے، میرا نام پاناما لیکس میں نہیں، نہ ہی 20 اپریل 2017کے سپریم کورٹ کے فیصلے میں ہے۔

انٹرپول نے سابق وزیر خزانہ اسحاق ڈار کو خط کے ذریعے مطلع کیا ہے کہ وہ کسی ریڈ نوٹس پر نہیں اور ان سے متعلق کسی قسم کی کوئی بھی کارروائی عمل میں نہیں لائی جا رہی ہے۔