امیر جماعت اسلامی سراج الحق نے کہا ہے کہ بنی گالہ، بنی مافیا بن چکا ہے۔

سراج الحق نے اپنے ایک بیان میں کہا کہ حکمران مغرب کے ایجنڈے پر گامزن ہیں، غریب عوام کو مہنگائی اور بے روزگاری کی آگ میں جھونک دیا گیا۔

اپنے بیان میں امیر جماعت اسلامی نے کہا کہ وزیر اعظم نے راتوں رات پھر عوام پر پٹرول بم گرایا اور دو وقت کی روٹی سے محروم عوام کو بجلی کے جھٹکے دیے جا رہے ہیں۔پیٹرول اور بجلی کی قیمتوں میں اضافے کو مسترد کرتے ہیں۔

امیر جماعت اسلامی کا کہنا تھا کہ بجلی کی قیمتوں میں پھر اضافہ ظالمانہ قدم ہے، آئی ایم ایف سے طے شدہ شرائط کو قومی اسمبلی میں لایا جائے۔

سراج الحق نے کہا کہ حکومت صبح، دوپہر شام مہنگائی کا اعلان کر رہی ہے، وزیر اعظم کا ریلیف پیکیج پہلے دن ہی تکلیف پیکیج ثابت ہوا۔

انہوں کا کہنا تھا کہ گزشتہ حکومتوں نے ملک کا ستیاناس کیا جبکہ پی ٹی آئی نے سوا ستیاناس کردیا، چاند پر جانے کی دعویدار حکومت نے ملک کو پستی کی طرف دھکیل دیا۔

امیر جماعت اسلامی کا یہ بھی کہنا تھا کہ وزیر اعظم اور اس کی ٹیم ناکام اور نالائق ہے ، بنی گالہ بھی اب  بنی مافیا بن چکا ہے۔

اپنے بیان میں سراج الحق نے کہا کہ کرپشن فری پاکستان صرف جماعت اسلامی دے سکتی ہے۔

ان کا کہنا تھا کہ جماعت اسلامی ہی ملک کو ترقی کی راہ پر گامزن کر سکتی ہے جبکہ ملک اسلامی نظام کے ذریعے ہی فلاحی ریاست بن سکتا ہے۔

 امیر جماعت اسلامی سراج الحق کا مزید کہنا تھا کہ جماعت اسلامی حکومتی اقدامات کے خلاف 28 نومبر کو اسلام آباد ڈی چوک میں احتجاج کرے گی، جماعت اسلامی کے نوجوان ملکی خوشحالی کے لیئے ہمارا ساتھ دیں۔