ترجمان جے یو آئی اسلم غوری نے  کہا ہے کہ عمران نیازی کی تقریرکے  آفٹر شاکس شروع ہوگئے ہیں۔

اسلم غوری نے  بجلی کی قیمتوں میں اضافے کی مذمت  کرتے ہوئے کہا کہ لگتا ہے حکومت کو بنیادی اشیائے ضرورت مہنگے کرنے کے علاوہ کوئی کام نہیں ۔

ترجمان جے یو آئی کا کہنا تھا کہ پیٹرول ،بجلی اور کھانے پینے کی بنیادی چیزوں کی قیمتیں آسمان سے باتیں کر رہی ہیں ، معلوم نہیں کہ کس ارسطو کی پالیسیوں پر حکومت فیصلے کرتی ہے ۔

انہوں نے کہا کہ مہنگائی ہونے پر حکومت سے مستعفی ہونے کا مطالبہ کرنے والے عمران نیازی کو اب شرم بھی نہیں آتی۔

 اسلم غوری کا کہنا تھا کہ عوامی مینڈیٹ سے تو حکومت میں آئے نہیں کہ عوامی مفادات کا خیال رکھیں ،  دھاندلی کے ذریعے منتخب کیا گیا اس لئے عوام کے سامنے خود کو جوابدہ نہیں سمجھتے ۔

ترجمان جے یو آئی اسلم غوری کا مزید کہنا تھا کہ عمران نیازی نے پتہ نہیں کس کو رلانے کا وعدہ کیا تھا ،اسے رلا سکے یا نہیں لیکن قوم کو رلا دیا ہے ۔

یاد رہے اس سے قبل نیشنل الیکٹرک ریگولیٹری اتھارٹی (نیپرا) نے بنیادی بجلی ٹیرف میں 1 روپیہ 68 پیسے فی یونٹ اضافے کی منظوری دے دی اور  بجلی مہنگی کرنے کا نوٹیفیکیشن جاری کر دیا ۔

نیپرا کے مطابق بجلی کے بنیادی ٹیرف میں اضافہ وفاقی حکومت کی درخواست پر کیا گیا، اضافے کے بعد بجلی کی فی یونٹ اوسط قیمت 15.36 روپے ہو گئی ہے۔

ترجمان نیپرا کا کہنا ہے کہ اضافے کا اطلاق کے الیکٹرک سمیت بجلی کی تمام تقسیم کار کمپنیوں پر ہو گا جبکہ فیصلے کا اطلاق وفاقی حکومت کے نوٹیفیکیشن کے بعد ہو گا۔

ترجمان کا یہ بھی کہنا ہے کہ ماہانہ 200 یونٹ تک استعمال کرنے والوں پر اضافہ لاگو نہیں ہو گا جبکہ 200 سے زائد یونٹ کےاستعمال پرگھریلوصارفین کیلئے بجلی ایک روپے 68 پیسے مہنگی ہوگی۔

 ترجمان نیپرا کا مزید کہنا ہے کہ اضافے سے بجلی صارفین کو 135 ارب روپے اضافی ادا کرنے ہوں گے  جبکہ کمرشل، صنعتوں اور باقی شعبوں کیلئے بجلی کی قیمت میں فی یونٹ ایک روپیہ 39 پیسے اضافہ ہوگا۔