خرم شیر زمان نے کہا ہے کہ پی ٹی آئی تاجر برادری کے ساتھ کھڑی ہے۔

پی ٹی آئی کراچی صدر خرم شیر زمان نے  کوآپریٹو مارکیٹ کے باہر میڈیا سے گفتگو کرتے ہوئے کہا کہ جب تک تاجروں کو انصاف نہیں ملتا میں جگہ چھوڑنے والا نہیں ہوں۔

انہوں نے کہا کہ جل کر خاک ہونے والی مارکیٹ کے باہر جتنی فائر بریگیڈ کھڑی ہیں وہ وزیراعظم عمران خان کا تحفہ ہے۔

پی ٹی آئی کراچی صدر کا کہنا تھا کہ کمشنر کراچی کمیٹی تشکیل دیں تاکہ اندازہ لگایا جاسکے کہ کتنا نقصان ہوا ہے، ہر سطح پر انکوائری ہونی چاہیے ۔

پی ٹی آئی کراچی صدر خرم شیر زمان  کا مزید کہنا تھا کہ پی ٹی آئی تاجر برادری کے ساتھ کھڑی ہے، اسمبلی جاکر حکومت سندھ کو اس بات پر آمادہ کرنے کی پوری کوشش کروں گا کہ جن کانقصان ہوا ان کا ازالہ کیا جائے۔

یاد رہے گزشتہ روز کراچی  کے علاقے صدر کو آپریٹومارکیٹ میں آگ بھڑک اٹھی ، اس اطلاع پر پولیس اور فائربریگیڈ کی دوگاڑیاں موقع پر پہنچیں، فائرفائٹرز نے آگ پر قابوپانے کی کوششیں شروع کی لیکن آگ نے مزید شدت اختیارکرلی۔

آگ کی شدت کو دیکھتے ہوئے چند دکانداروں نے اپنا قیمتی سامان محفوظ مقام پر منتقل کیا، تاجر و ں نے الزام عائد کیا کہ فائر بریگیڈ تاخیر سے پہنچی، پولیس اور فائر بریگیڈ سے مدد کے لیے رابطہ کرتے رہے لیکن رابطہ نہیں ہوا۔

چیف فائر آفیسر مبین احمد کا  میڈیا سے گفتگو کرتے ہوئے کہنا تھا  کہ فائربریگیڈ کی 10 سے زائد گاڑیاں  موقع پر پہنچی تھیں، دکانوں میں لگنے والی آگ پر تقریباً 4 گھنٹے کی جدوجہد کے بعد قابو پایا گیا۔

ان کا مزید کہناتھا کہ مارکیٹ کے اگلے اورپچھلے حصے کی دکانیں آگ کی لپیٹ میں آئیں تاہم کولنگ کا عمل مکمل ہونے کے بعد ہی مزید صورت حال سامنے آسکے گی۔