مختلف کمپنیوں کی جانب سے اب تک کئی جدید اور بیش قیمت فون متعارف کروائے جاچکے ہیں جن میں آئی فون بنانے والی کمپنی ایپل کا شمار بھی ہوتا ہے۔

سب سے حیران بات یہ ہے کہ دنیا کا سب سے مہنگا ترین موبائل فون بنانے کا اعزاز بھی اسی کمپنی ایپل کو ہی حاصل ہے۔

غیر ملکی خبر رساں ادارے کی رپورٹ کے مطابق ویسے تو ایک آئی فون کی قیمت ڈیڑھ ہزار ڈالرز (سب سے مہنگے ورژن کی) سے کم ہی ہوتی ہے،مگر 2017 کے آئی فون ایکس نے سب سے مہنگے ایپل فون کا اعزاز حاصل کرلیا۔

یہ دنیا کا پہلا ایسا آئی فون ہے جس میں لائٹننگ پورٹ کی بجائے چارجنگ کے لئے یو ایس بی سی پورٹ موجود ہیں۔

ایک روبوٹک انجنیئرنگ کے طالب علم کین پیلونی نے اس آئی فون ایکس کی روایتی چارجنگ پورٹ کو یو ایس بی سی پورٹ سے بدل دیا ہے۔

 اس پورٹ کو چارجنگ اور ڈیٹا ٹرانسفر دونوں کے لئے استعمال کیا جاسکتا ہے۔

اس موڈیفائی آئی فون ایکس کو اشیاء فروخت کرنے والی سائٹ ای بے پر 86 ہزار ایک ڈالرز (ڈیڑھ کروڑ پاکستانی روپے سے زائد) میں نیلام کیا گیا ہے مگر کین پیلونی نے اسے خریدنے والے کو خبردار کردیا۔

کین پیلونی کے مطابق تاریخ ساز ڈیوائس کو کسی عام فون کی طرح استعمال نہ کریں یعنی آپریٹنگ سسٹم اپ ڈیٹ نہ کریں، ورنہ پورٹ بیکار ہونے کا خطرہ ہوسکتا ہے۔

اوریجنل آئی فون ایکس کی قیمت 999 ڈالرز سے شروع ہوئی تھی تو یہ موڈیفائی ماڈل 80 گنا سے زیادہ قیمت پر فروخت ہوا ہے۔

کین پیلونی نے آئی فون میں اس تبدیلی کی تمام تر تفصیلات اوپن سورس پراجیکٹ کے طور پر Github میں دی ہیں مگر لائٹننگ پورٹ کو یو ایس بی سی پورٹ سے بدلنا کوئی آسان کام نہیں۔

اس فون کی نیلامی ایک ڈالر سے شروع ہوئی تھی اور پہلے دن کے اختتام تک 3 ہزار ڈالرز تک پہنچ گئی تھی۔

 اس کے بعد اس میں ہزاروں ڈالرز کا اضافہ ہوا اور ایک لاکھ ڈالرز کی پیشکش بھی ہوئی مگر وہ نیلامی کا وقت ختم ہونے سے قبل واپس لے لی گئی۔

اب یہ پروٹوٹائپ آئی فون فروخت ہوچکا ہے مگر وہ طالب علم اس کام کو جاری رکھنے کے لئے پرعزم ہے تاکہ یوایس سی سے آئی فونز میں فاسٹ چارجنگ، واٹر پروفنگ اور دیگر کو بہتر بناسکے۔