الیکشن کمیشن آف پاکستان (ای سی پی) کے سیکریٹری عمر حامد خان کا کہنا ہے کہ ای سی پی ای وی ایم کے تحت انتخابات کرانے کا پابند نہیں ہے۔

پاکستان تحریک انصاف (پی ٹی آئی) کے ایم این اے ریاض فتیانہ کی زیر صدارت قومی اسمبلی کی قائمہ کمیٹی برائے قانون و انصاف کے اراکین کے اجلاس کو بریفنگ دیتے ہوئے عمر حامد کہا کہ مشینوں پر منتقل ہونے کیلئے بھارت کو 20 اور برازیل کو 22 سال لگے۔ ہمیں ان مشینوں کو چلانے میں بھی کچھ وقت لگے گا۔

سیکرٹری نے مزید کہا کہ بل کی منظوری کے فوراً بعد الیکشن کمیشن کے لیے مشینوں کا استعمال ضروری نہیں ہے۔

ان کا کہنا تھا کہ “ہم مشینوں کو استعمال کرنے کے پابند نہیں ہیں۔ ای وی ایم کے استعمال میں چیلنجز ہیں۔ ہم یقین سے کچھ نہیں کہہ سکتے کہ آیا ای وی ایم کا استعمال اگلے انتخابات میں لاگو ہوگا یا نہیں۔”

عمر حامد نے بتایا کہ عام انتخابات میں استعمال ہونے سے پہلے ای وی ایم کو 14 مراحل سے گزرنا ہوگا۔ اس کے استعمال سے متعلق تین سے چار اور پائلٹ پروجیکٹ ہوں گے۔

ان کا کہنا تھا کہ پولنگ سٹیشن پر کتنی الیکٹرانک ووٹنگ مشینیں ہوں گی اس کا بھی پتہ لگانا باقی ہے۔ ریاستی ادارہ بیرون ملک مقیم پاکستانیوں کی سہولت کے لیے بھی کام کر رہا ہے۔

اس موقع پر ایم این اے عالیہ کامران نے کچھ انتہائی دلچسپ سوالات اٹھائے جن میں یہ بھی شامل تھا کہ جن علاقوں میں انٹرنیٹ سروس نہیں ہے وہاں ای وی ایم مشین کیسے استعمال کی جائے گی۔

انہوں نے پوچھا بلوچستان کے لوگ بمشکل ووٹ ڈالنے جاتے ہیں، وہ ای وی ایم پر ووٹ کیسے ڈالیں گے؟