وزیراعلیٰ خیبر پختونخوا محمود خان کا کہنا ہے کہ پاکستان کارڈ کے ذریعے عوام کو اشیائے ضروریہ پر سبسڈی دی جائے گی۔

وزیراعلیٰ خیبر پختونخوا محمود خان نے سوات میں جلسے سے خطاب کرتے ہوئے کہا کہ بیرونی قرضوں کی ادائیگی نہ کرنی ہوتی تو وہی رقم غریب پر خرچ کرتے۔

انہوں نے کہا کہ سابق حکمرانوں کا ایجنڈا لوٹ مار تھا، ماضی کی حکومتوں کی وجہ سے قرضے میں اضافہ ہوا ہے۔

محمود خان کا کہنا ہے کہ جلد پاکستان کارڈ کا اجراء ہوگا، پاکستان کارڈ کے ذریعے عوام کو اشیائے ضروریہ پر سبسڈی دی جائے گی۔

وزیراعلیٰ محمود خان نے مزید کہا کہ یہ چوروں اور لیٹروں کا نہیں عوام کا ملک ہے۔

اس سے قبل وفاقی وزیر مواصلات مراد سعید نے بھی سوات میں جلسے سے خطاب کرتے ہوئے کہا کہ وزیراعظم نے دنیا میں پاکستان کی نمائندگی کی، حکومت نے بہترین انداز میں قانون سازی کی ہے۔

مراد سعید نے کہا کہ مشترکہ اجلاس میں اپوزیشن کی مخالفت کے باوجود قانون پاس کروائے، پیپلزپارٹی اور ن لیگ پہلے سے کہہ رہے ہیں اگلا الیکشن نہیں مانتے۔

وفاقی وزیر کا کہنا تھا کہ 2023 میں دونوں جماعتوں کو شکست ہونی ہے، ای وی ایم سے بیلٹ بکس چوری کا خاتمہ ہوگا، دونوں جماعتوں کے دور میں اوورسیز پاکستانیوں کو کوئی پوچھنے والا نہیں تھا۔

انہوں نے مزید کہا کہ بیرون ملک پاکستانیوں کو ووٹ کا حق مل گیا ہے، محب وطن اوورسیز پاکستان پیسے بھیجتے ہیں، اگلی بار پھر عمران خان کی حکومت ہوگی۔