آئی ایس آئی کے سابق سربراہ لیفٹیننٹ جنرل فیض حمید نے کور کمانڈر پشاور کی ذمہ داریاں سنبھال لی ہیں۔

آئی ایس پی آر کے مطابق پشاور میں پروقار تقریب کا انعقاد کیا گیا جس میں لیفٹیننٹ جنرل نعمان محمود نے لیفٹیننٹ جنرل فیض حمید نے کور کمانڈر پشاور کی ذمہ داریاں سونپی۔

6 اکتوبر کو پاک فوج کی جانب سے اعلیٰ افسروں کے تقرر اور تبادلوں کا اعلان کیا گیا تھا جس کے تحت لیفٹیننٹ جنرل فیض حمید کو کور کمانڈر پشاور مقرر کیا گیا تھا۔ ان کی جگہ لیفٹیننٹ جنرل ندیم انجم نئے ڈی جی آئی ایس آئی مقرر کئے گئے تھے۔

لیفٹیننٹ جنرل فیض حمید کا پیشہ وارانہ پس منظر

لیفٹیننٹ جنرل فیض حمید کا تعلق چکوال سے ہے، لیفٹینٹ جنرل فیض حمید جون 2019 میں ڈی جی آئی ایس آئی مقرر کئے گئے تھے، اپریل 2019 میں ان کی لیفٹیننٹ جنرل کے عہدے پر ترقی ہوئی تھی۔

ڈی جی آئی ایس آئی کی تعیناتی سے قبل وہ جی ایچ کیو میں ایڈجوٹنٹ جنرل کے عہدے پر فائز تھے، اس سے قبل لیفٹیننٹ جنرل فیض حمید راولپنڈی میں 10 کور کے چیف آف اسٹاف، پنوں عاقل میں جنرل آفیسر کمانڈنگ ، انٹر سروسز انٹیلی جنس میں ڈی جی کاؤنٹر انٹیلی جنس ( سی آئی ) سیکشن خدمات سر انجام دے چکے ہیں ۔

للیفٹیننٹ جنرل فیض حمید کو صدر پاکستان کی جانب سے ہلال امتیاز ملٹری کا اعزاز بھی مل چکا ہے۔