شہد انسان کیلئے قدرت کی عطا کردہ بیش بہا نعمتوں میں سے ایک ہے جس کا کوئی کانعم البدل موجود نہیں ہے۔

خالق کائنات نے انسان کو جتنی غذائی نعمتیں بخشی ہیں ان سب میں شہد کو ممتاز درجہ حاصل ہے۔

شہد عموماً دو قسم کا ہوتا ہے، ایک ہلکا زردی مائل اور شفاف، پتلا ، نہایت میٹھا، یہ چھوٹی مکھی کا اعلیٰ درجے کا شہد مانا جاتا ہے۔

دوسرا بادامی رنگ کا قدرے گاڑھا ہوتا ہے اور اس کے ذائقے میں فرق ہوتا ہے۔

شہد کی افادیت صرف ہمارے جسم کے اندرونی نظام کی مضبوطی تک ہی محدود نہیں ہے بلکہ اسے لوگ چہرے کی خوبصورتی  کیلئے بھی استعمال کرتے ہیں۔

جسمانی طاقت اور بیماریوں سے بچاؤ کے لیے شہد کے حیرت انگیز فوائد مندرجہ ذیل ہیں۔

امراض قلب کے خطرات کو کم کرتا ہے:

شہد استعمال کرنے سے کولیسٹرول پر قابو رکھا جا سکتا ہے، شہد خون میں ایچ ڈی ایل یعنی گڈ کولیسٹرول کو بڑھاتا ہے۔

شہد کے اند رموجود ایکس پیکٹورینٹ اور سوتھنگ جیسی خوبیا ں نظام تنفس کے انفیکشن سے بچاؤ کے لیے مفید ہیں۔

پانی میں شہد اور الائچی ڈال کر ابال لیں اور اسے روزانہ استعمال کریں۔ اس مکسچر کے استعمال سے کولیسٹرول 10فیصد تک کم ہوجاتا ہے۔

موٹاپا کم کرنے کے لیے:

 محض شہد کے استعمال سے موٹاپے پر قابو نہیں پایا جاسکتا، اس کے لیے معتدل غذا، مناسب ورزش اور طرز زندگی کو بدلنے کی بھی ضرورت ہوتی ہے۔

شہد ایک بہترین ڈیٹوکس ایجنٹ ہے جس سے وزن کم کرنے میں کافی حد تک مدد مل سکتی ہے۔

اس کے استعمال سے جگر کی صفائی ہوجاتی ہے اور جگر میں موجود غیر ضروری چربی بھی اپنے آپ ہی گھل جاتی ہے۔

اس سے نظام استحالہ بہتر ہوتا ہے اوریہ نظام ہاضمہ کے لیے بھی مفید ہے۔

خوبصورت اور دلکش جلد

شہد کئی خواتین کی چمکتی اور صحت مند جلد کا راز ہے۔ اسے قدرتی موئسچرائزر، ایکسفولیئنٹ اور اینٹی ایجنگ ایجنٹ کے طور پر استعمال کیا جاسکتا ہے۔

شہد کو کئی جلدی نگہداشت کی مصنوعات میں استعمال کیا جاتا ہے۔  یہ سورج کی خطرناک شعاعوں سے جلد کی حفاظت کرتا ہے اور خشک اور بے رونق جلد کو تازہ دم کردیتا ہے۔

کیل اور مہاسوں سے بچاؤ:

کیل مہاسے محض چہرے پر ہی نہیں بلکہ جسم کے دیگر حساس حصوں پہ بھی نکل آتے ہیں، ان سے بچنے کے لیے شہد کااستعمال بے انتہا مفید ہے۔

شہد جلد کے تباہ شدہ خلیے اوران میں موجود میل کچیل کو ختم کرکے جلد کو ترو تازہ کرتا ہے۔

شہد ایک زبردست اینٹی سیپٹک ہے جو جلد کوآلودگی سے بھی محفوظ رکھتا ہے جو کہ کیل مہاسوں کی ایک اہم وجہ ہے۔

مضبوط اور صحت مند بال:

موسم کے باعث روکھے اور بے رونق ہوجانے والے بالوں کے لیے شہد ایک بہترین غذا اور علاج ہے۔

یہ خشکی دور کرتاہے اور بالوں میں نمی برقرار رکھتا ہے۔

اکثر بال دھونے کے بعد خشک ہوجاتے ہیں لیکن شہد کا استعمال انہیں نرم و ملائم رکھتا ہے۔

شہد سے بالوں کا رنگ بھی زیادہ عرصے تک برقرار رہتا ہے۔

سفید اور گرتے بالوں کے لیے شہد کا استعمال بے انتہا فائدے مند ہے۔ جو لوگ بالوں پر رنگ کرتے ہیں ان کے لیے بھی شہد کا استعمال بے حد ضروری ہے۔ یہ نقصان دہ کیمیکل کا مقابلہ کرکے بالوں کو ان کی اصل شکل میں برقرار رکھتا ہے۔

ذیابیطس پہ قابو پانے کے لیے:

شہد قدرتی شکر حاصل کرنے کا ایک بہترین ذریعہ ہے اس لیے اسے سفید شکر کی جگہ استعمال کیا جاسکتا ہے۔ شہد نا صرف جسم کو توانا رکھتا ہے بلکہ یہ سفید شکر کی طرح نقصان دہ بھی نہیں ہے۔ البتہ ذیابیطس کے مریضوں کو اعتدال میں رہ کر شہد کا استعمال کرنا چاہیے اور اسے استعمال کرتے ہوئے اپنے شوگر لیول کو مانیٹر کرتے رہنا چاہیے۔

وزن کم کرنے کے لئے بے حد فائدے مند:

نہار منہ شہد کا گرم پانی اور لیموں کے ساتھ استعمال وزن کم کرنے لیے بے حد فائدے مند ہے۔

یہاں یہ بات قابل ذکر ہےکہ ایک چمچ شہد میں 63 کیلریز ہوتی ہیں اس لیے اسے اعتدال میں رہ کر ہی استعما ل کرنا چاہیے۔

شہد کو سفید شکر کے متبادل کے طور پر استعمال کیا جاسکتا ہے۔ شہد کا تھوڑی مقدر میں استعمال بھی چینی کی کمی کو پورا کردیتا ہے اور یہ نقصان د ہ بھی نہیں ہے۔

شہد کو چائے میں ڈال کر پینے سے نا صرف چائے کا ذائقہ مزید اچھا ہوجا تا ہے بلکہ اس سے چائے کی افادیت میں بھی اضافہ ہوجاتا ہے۔

سینے اور گلے کا انفیکشن:

سینے اور گلے کے انفیکشن سے بچاؤ کے لیے دو بڑے چمچ شہد کا سونے سے قبل استعمال انتہائی مفید ہے اس سے گلے کی سوزش کم ہوتی ہے۔

اس کے ساتھ ہی اس سے نیند بھی اچھی آتی ہے۔ ایلرجی اور گلے کے انفیکشن سے بچاؤ کے لیے چائے میں شہد ڈال کرپینا چاہیے۔

بہترین اینٹی بیکٹریل:

شہد کی ایک اہم خصوصیت اور افادیت یہ بھی ہے کہ اس سے زخم جلد بھر جاتا ہے۔

دودھ پلانے والی خواتین کے لیے شہد کا استعمال بہت مفید ہے اس کے استعمال سے چھاتی کے انفیکشن پر قابو پایا جاسکتا ہے اور یہ ایک بہترین پین کلر بھی ہے۔

دودھ پلانے والی خواتین شہد کے بطور دوا اور بطور مرہم استعمال سے ہر قسم کے بیکٹریاز سے خود کو اور اپنے بچے کو محفوظ رکھ سکتی ہیں۔