کراچی میں لگنے والے ہفتہ وار بچت بازار میں عوام کو مہنگائی سے ریلیف فراہم کرنے کا ذریعہ بن گئے۔

بچت بازاروں میں استعمال شدہ اشیا، جوتے، کپڑے، کمبل، برتنوں کے علاوہ کھانے پینے کی اشیا سبزیاں اور پھل کے اسٹالز عوام کو مہنگائی سے مقابلہ کرنے میں مدد فراہم کررہے ہیں۔

کراچی میں بیورو آف سپلائی اینڈ پرائسز کا کہنا ہے کہ این او سی سے 150کے لگ بھگ بچت بازار لگائے جارہے ہیں جبکہ ڈپٹی کمشنرز کی اجازت سے لگنے والے بچت بازاروں اور این او سی کے بغیر لگنے والے علاقائی بچت بازاروں کی تعداد بھی 100کے لگ بھگ ہے۔

محکمہ کا کہنا تھا کہ بچت بازاروں میں سبزیاں عام دکانوں اور بازاروں سے کافی کم قیمت پر فروخت ہورہی ہیں اس لیے شہری ہفتہ بھر کی سبزیوں اور پھلوں کی خریداری کے لیے بچت بازاروں کو ترجیح دے رہے ہیں۔

بازار انتظامیہ کی مطابق خریداری کے لیے آنے والے شہری سرکاری پرائس لسٹ کے مطابق قیمت ادا کرتے ہیں ہر اسٹال پر اسٹال ہولڈر کی تصویر کے ساتھ پرائس لسٹ بھی لگائی گئی ہے اور زیادہ نرخ لینے والے اسٹال ہولڈرز کے اسٹال بند کرادیے جاتے ہیں جس کی وجہ سے بچت بازار شہر کے دیگر علاقوں کے مکینوں کے لیے بھی مہنگائی سے ریلیف کا ذریعہ بنا ہوا ہے۔

واضح رہے کہ کراچی میں ہفتہ وار بچت بازار لگ بھگ ڈیڑھ سال سے زائد عرصہ بند رہنے کے بعد ستمبر 2021 کے آخر میں لگنا شروع ہوئے جس کے بعد عوام نے سکھ کا سانس لیا۔

بچت بازار میں نئی فصل کا آلو 50 روپے کلو فروخت ہورہا ہے جو عام بازاروں میں 80 روپے کلو تک فروخت ہورہا ہے جبکہ ٹماٹر جو عام بازاروں میں 180 روپے کلو تک فروخت ہورہے ہیں بچت بازاروں میں 120روپے کلو فروخت ہورہے ہیں۔