کراچی میں قائم غیر قانونی قرار دی گئی عمارت نسلہ ٹاور کو گرانے کا کام روک دیا گیا۔

اسسٹنٹ کمشنر نے نسلہ ٹاور گرانے کا کام رکوا دیا جس کے بعد  مزدور واپس روانہ ہوگئے۔

اس حوالے سے پاکستان تحریک انصاف کے رکن اسمبلی علی جی جی نے بول نیوز سے گفتگو میں کہا کہ وزیراعلیٰ سندھ مراد علی شاہ ناصر شاہ سے میرا سوال ہے نسلہ ٹاور سمیت دیگر تعمیرات سے متعلق سندھ حکومت نے اسمبلی قرارداد پاس کرائی، لیکن آج پھر یہ توڑنے کیسے پہنچ گئے۔

علی جی جی کا کہنا تھا کہ سندھ حکومت اپنی سیاست کر رہی ہے، لوگوں نے بڑی مشکل سے اپنے فلیٹ لیے۔

پارلیمانی رکن علی جی جی نے مزید کہا کہ سندھ اسمبلی سے پاس کی گئی قرارداد میں پیپلز پارٹی نے نسلہ ٹاور کا زکر تک نہیں کیا۔

خیال رہے کہ چیف جسٹس گلزار احمد کی سربراہی میں تین رکنی بینچ نے 25 اکتوبر 2021 کو کراچی رجسٹری میں نسلہ ٹاور گرانے سے متعلق کیس کی سماعت کی تھی۔ سپریم کورٹ نے نسلہ ٹاور کو ایک ہفتے کے اندر اندر گرانے کا حکم دے دیا تھا۔

عدالت نے ریمارکس دئے تھے کہ کسی قسم کی کوئی رعایت نہیں ملے گی، عمارت گرائیں اور کمشنر کراچی ملبہ اٹھانے کا کام شروع کریں۔

عدالت نے کمشنر کراچی کو ایک ہفتے کے اندر نسلہ ٹاور کی عمارت ‘کنٹرولڈ ایمونیشن بلاسٹ’ سے گرانے کا حکم دے دیا تھا۔

سپریم کورٹ نے ہدایت کی تھی کہ دھماکے سے قریبی عمارتوں یا کسی انسان کو کوئی نقصان نہیں ہونا چاہیے۔ عمارت کا مالک متاثرین کو رقم واپس کرے اور کمشنر کراچی متاثرین کو رقوم کی واپسی یقینی بنائیں۔