افریقی ملک سوڈان میں اقتدار پر قبضے کے دوران گرفتار کیے گئے سیاسی رہنماؤں کو رہا کردیا گیا۔

غیر ملکی خبررساں ادارے کے مطابق گزشتہ روز افریقی ملک سوڈان میں فوج اور سیاسی جماعتوں کے درمیان 14 نکاتی معاہدے کے بعد سول حکومت دوبارہ بحال ہوگئی اور فوجی بغاوت میں برطرف کیے گئے وزیراعظم عبداللہ حمدوک نے دوبارہ حکومت سنبھال لی۔

فوج اور حکومت کے درمیان ہونے والے معاہدے کے تحت فوجی بغاوت کے دوران حراست میں لیے گئے اہم سیاسی رہنماؤں کو رہا کردیا گیا ہے۔

ذرائع کے مطابق سوڈان میں اقتدار پر قبضہ کرنے والی فوج اور سیاسی رہنماؤں کے درمیان معاہدے کے لیے اقوام متحدہ اور  امریکا سمیت چند اور ممالک نے بھی کردار ادا کیا۔

خیال رہے افریقی ملک سوڈان میں گزشتہ ماہ جنرل عبدالفتاح البرہان نے اقتدار پر قبضہ کرتے ہوئے حکومت کو تحلیل کردیا تھا اور وزیراعظم عبداللہ حمدوک سمیت اہم سیاسی رہنماؤں کو حراست میں لے لیا تھا۔

فوجی بغاوت کے بعد ملک بھر میں ہنگامے شروع ہوگئے تھے اور فوج کی جانب سے عوام کو احتجاجی مظاہروں سے روکنے کی پوری کوشش کی گئی اس دوران 41 ہلاکتیں بھی ہوئیں۔

دوسری جانب امریکا کی جانب سے فوجی بغاوت کے بعد سوڈان کی معاشی امداد بھی روک دی گئی تھی تاہم فوج اور سیاسی قیادت میں معاہدے کے بعد امکان ظاہر کیا جارہا ہے، معاشی امداد دوبارہ بحال کردی جائے گی۔