سوڈان کے وزیراعظم عبداللہ حمدوک کا کہنا ہے کہ ملک میں خون ریزی سے بچنے کے لیے فوج سے معاہدہ کیا۔

عرب میڈیا کو انٹریو دیتے ہوئے سوڈان کے عبوری وزیراعظم عبداللہ حمدوک نے کہا کہ ملک میں خون ریزی سے بچنے اور حالیہ کشیدگی کا حل نکالنے کے لیے فوج کے ساتھ سیاسی معاہدہ کیا۔

سوڈان کے وزیراعظم نے امید ظاہر کی کہ نئی حکومت 2 ہفتوں کے اندر تشکیل دی جائے گی اور میں پوری کوشش کروں گا کہ جلد سے جلد انتخابات کی راہ ہموار ہو کیوں کہ ہمارے پاس بات چیت کا کوئی متبادل راستہ نہیں۔

عبداللہ حمدوک کا کہنا تھا کہ انتخابات سے سوڈان میں جمہوریت کی مضبوطی اور استحکام کا راستہ کھل جائے گا اور ملک میں آزادی وتبدیلی کی قوتیں بدستور مؤثررہیں گی جب کہ میں اپنی مقبولیت کے بارے میں نہیں سوچتا بلکہ سوڈانی عوام کے مفاد میں فیصلے کرتا ہوں۔

دوسری جانب سوڈان کی جمہوریت نواز تحریک حکومت اور فوج کے دوران ہونے والے معاہدے سے خوش نہیں ہیں اور انہوں نے عبداللہ حمدوک پر الزام لگایا گیا کہ وہ ملک میں فوجی حکمرانی کے تسلسل کے لیے کام کررہے ہیں۔

دو روز قبل افریقی ملک سوڈان میں فوج اور سیاسی جماعتوں کے درمیان 14 نکاتی معاہدے کے بعد فوجی بغاوت میں برطرف کیے گئے وزیراعظم عبداللہ حمدوک نے دوبارہ حکومت سنبھال لی تھی۔

واضح رہے سوڈان میں اقتدار پر قبضہ کرنے والی فوج اور سیاسی رہنماؤں کے درمیان معاہدے کے لیے اقوام متحدہ اور  امریکا سمیت چند اور ممالک نے اہم کردار ادا کیا جب کہ حکومت کی بحالی کے بعد فوجی بغاوت کے دوران حراست میں لیے گئے اہم سیاسی رہنماؤں کو رہا کردیا گیا۔