میاں اسلم اقبال کا کہنا ہے کہ صوبے میں نئے صنعتی یونٹس لگنے سے روزگار کے ہزاروں نئے مواقع پیدا ہونگے۔

صوبائی وزیر صنعت وتجارت میاں اسلم اقبال دبئی ایکسپو میں پاکستان پویلین آمد ہوئے جہاں انہوں نے اسٹارٹ اپس، دبئی ایکسپو کے ویزیٹرز اور سرمایہ کاروں سے گفتگو کی۔

انہوں نے کہا کہ دبئی ایکسپو میں عالمی شہرت کی حامل سرمایہ کار کمپنیوں سے طے پانے والے معاہدوں کے ثمرات جلد سامنے آئیں گے، معاہدوں پر عمل درآمد سے 45ارب روپے کی نئی سرمایہ کاری سے پنجاب کی معیشت مضبوط ہوگی۔

میاں اسلم اقبال نے کہا کہ صوبے میں نئے صنعتی یونٹس لگنے سے روزگار کے ہزاروں نئے مواقع پیدا ہوں گے۔ دبئی ایکسپو میں اسٹارٹ اپس کو اپنے آئیڈیاز شیئر کرنے کے لئے پلیٹ فارم مہیا کیا گیا ہے۔

صوبائی وزیر کا کہنا ہے کہ پنجاب کے دستکاروں نے اپنی ہینڈی کرافٹس کی نمائش کے ذریعے دنیا بھر میں پاکستان کا نام روشن کیا اور ہینڈی کرافٹس کی فروخت بڑھا کر پنجاب کی معیشت کو مزید مضبوط کریں گے۔

انہوں نے کہا کہ حکومت نے دستکاروں کو آرٹیزن ویلیجز بنا کر اپنے فن کو نکھارنے کا پلیٹ فارم دیا، نیا کاروبار شروع کرنے کے لئے پنجاب روزگار اسکیم کے تحت آسان قرضے دیئے جارہے ہیں، ہنر مند نوجوان پنجاب حکومت کی اس شاندار اسکیم سے فائدہ اٹھائیں۔

اسلم اقبال نے مزید کہا کہ دبئی ایکسپو کے پاکستان پویلین میں روزانہ ہزاروں لوگ آتے ہیں اور ویزیٹر ز پاکستان پویلین کو نمبر ون قرار دے رہے ہیں۔

واضح رہے کہ پنجاب اسمال انڈسٹریز کارپوریشن کے ڈائریکٹر کریٹیو اینڈ کلچر یاور مہدی نے صوبائی وزیر کو دبئی ایکسپو میں جاری سرگرمیوں سے آگاہ کیا۔