قومی اسمبلی میں قائد حزبِ اختلاف  اور مسلم لیگ (ن) کے صدر میاں شہباز شریف اور (ن) لیگی رہنما مریم اورنگزیب نے صحافی احمد نورانی کی اہلیہ اور بچوں پر مبینہ حملے کی مذمت کی ہے۔

شہباز شریف نے اپنے ٹوئٹر پیغام میں لکھا کہ صحافی عنبرین فاطمہ، جوتحقیقی صحافی احمد نورانی کی اہلیہ بھی ہیں، پر حملے کی جتنی مذمت کی جائے کم ہے۔

شہباز شریف نے اپنے ٹوئٹ میں مطالبہ کیا کہ اس واقعہ کی اعلیٰ سطحی تحقیقات کرائی جائے اور مرتکب عناصر کو قانون کے مطابق سخت سزا دی جائے۔

شہباز شریف نے مزید لکھا کہ صحافت کے لئے اس سیاہ اور بدترین دور میں “کالم اور پروگرام بند کرادو” جیسے ہتھکنڈے معمول بن چکے ہیں،  جو پاکستان کے عالمی امیج کو تباہ کررہے ہیں، حملوں سے سچ کی تڑپ رکھنے والوں کو روکا جاسکتا ہے نہ ہراساں کیا جاسکتا ہے۔

جبکہ لیگی ترجمان مریم اورنگزیب نے لکھا کہ نامور صحافی احمد نورانی کی اہلیہ صحافی عنبرین فاطمہ نے فون پر مجھے گزشتہ رات کے واقعے، خود اور گاڑی پر ڈنڈے برسانے کی تفصیل بتائی۔

مریم اورنگزیب کے مطابق عنبرین فاطمہ نے بتایا کہ حملے اور ”جان سے مار دوں گا“ کی دھمکیاں دیتے وقت گاڑی میں ان کے بچے بھی سوار تھے، پولیس میں ایف آئی آر درج کرا دی ہے۔

مریم اورنگزیب نے کہا کہ عنبرین کا حوصلہ قابل فخر ہے۔