آئی جی پنجاب راؤ سردار علی خان نے پولیس ٹریننگ کالج چوہنگ کا دورہ کیا ہے۔

تفصیلات کے مطابق ٹریننگ کالج پہنچنے پر پنجاب پولیس کے چاک و چوبند دستے نے آئی جی پنجاب کو سلامی پیشں کی ہے۔

آئی جی پنجاب نے زیر تربیت افسران واہلکاروں کیلئے دستیاب سہولیات کا جائزہ لیا اور مختلف سیکشنز کا دورہ کیا۔

راؤ سردار نے کہا کہ جدید تقاضوں کے مطابق پولیس فورس کی پیشہ ورانہ تربیت میری اولین ترجیح ہے۔

ان کا کہنا ہے کہ پولیس کی کارکردگی کو بہتر بنانے کے لیے تفتیش کے نظام کومزید بہتر بنایا جائے۔

آئی جی پنجاب نے ہدایت دی ہے کہ محرر، تفتیشی افسران و دیگر عملے کی ٹریننگ کیلئے جدید کورسز ترجیحی بنیادوں پر کروائے جائیں۔

انہوں نے کہا کہ فیلڈ میں کام کرنے والے افسران و اہلکاروں کو ریفریشر کورسسز کروائے جائیں تاکہ ان کی استعداد کار میں اضافہ ہو، شہادتوں کو محفوظ بنانے کیلئے جدید ٹیکنالوجی اورماڈرن پریکٹس کے موثر استعمال پر توجہ دی جائے۔

آئی جی پنجاب نے ہاسٹل میں دستیاب سہولیات کا جائزہ لیا اور میس میں کھانے کے معیار بارے دریافت کیا۔

راؤ سردار علی خان نے کہا کہ صوبے کے تمام ٹریننگ کالجز میں زیر تربیت افسران و اہلکاروں کو بہترین سہولیات فراہم کی جائیں۔

انہوں نے مزید کہا کہ فورس کا تربیتی معیار بہتر بنا کر ہم شہریوں کی خدمت اور حفاظت کا فریضہ بہتر انداز میں سر انجام دے سکتے ہیں۔

واضح رہے کہ کمانڈنٹ پولیس ٹریننگ کالج چوہنگ نے آئی جی پنجاب کو تربیتی نصاب، انویسٹی گیشن اسکول سمیت دیگر امور کے بارے میں بریفنگ بھی دی۔