وزیراعظم کی معاون خصوصی سینیٹر ثانیہ نشتر کا کہنا ہے کہ کورونا وائرس کے چیلنجز کے باوجود احساس پروگرام ایک بڑا پروگرام ہے۔

وزیراعظم عمران خان کی معاون خصوصی برائے سماجی تحفظ ڈاکٹر ثانیہ نشتر نے نسٹ یونیورسٹی میں سیمینار سے خطاب کیا اس دوران شرکاء کو احساس پروگرام سے متعلق آگاہ کیا۔

سیمینار سے خطاب کرتے ہوئے سینیٹر ڈاکٹر ثانیہ نشتر کا کہنا تھا کہ کورونا وائرس کے چیلنجز کے باوجود احساس پروگرام ایک بڑا پروگرام ہے ، ملک بھر کی ہر تحصیل میں ون ونڈو احساس سینٹر کھولے جائیں گے۔

ڈاکٹر ثانیہ نشتر نے کہا کہ احساس پروگرام کے خلاف الزامات بھی عائد کیے گئے لیکن ہمارے پاس احساس پروگرام کے تحت استعمال ہونے والے بجٹ کا تمام ڈیٹا اور آڈٹ موجود ہے جب کہ حکومتیں بدلتی ہیں تو پراجیکٹ ختم کر دیے جاتے ہیں ، اگر عوام ہمارے پروگرام سے مستفید ہو رہے ہیں تو خود یہ پراجیکٹ چلتا رہے گا۔

وزیراعظم کی معاون خصوصی نے مزید کہا کہ احساس پروگرام کے تحت انڈرگریجویٹ اسکالرشپس بھی فراہم کی جا رہی ہیں ، نیشنل پروگرام میں 50 ہزار جب کہ رواں برس 90 ہزار سکالرشپس فراہم کی گئی ہیں ، رواں برس اسکالرشپس کا بجٹ بھی بڑھا دیا گیا ہے ، احساس اسکالرشپ پروگرام میں اپلائی کرنے کے لیے آخری تاریخ 30 نومبر میں توسیع کی جائے گی۔