پی ٹی آئی کراچی کے صدر خرم شیرزمان کا کہنا ہے کہ معصوم بچوں پر ظلم ڈھانے والے کسی رعایت کے مستحق نہیں۔

پاکستان تحریک انصاف کراچی کے صدر خرم شیرزمان نے کہا ہے کہ کراچی گلشنِ حدید میں نومولود بچے کو زندہ جلانے کا واقعہ انتہائی افسوسناک ہے، معاشرے میں انسانیت کو شرمندہ کرنے والوں کو عبرتناک سزا دی جائے۔

خرم شیرزمان کا کہنا تھا کہ بچے کو فوری بہترین طبی سہولیات فراہم کرنے کا مطالبہ کرتے ہیں، حکومتی سطح پر ایسے واقعات کی روک تھام کیلئے سوشل  میڈیا کا سہارا لیا جائے، معصوم بچوں سے ان کی زندگی کاحق چھیننے والے کسی درندے سے کم نہیں۔

پی ٹی آئی کراچی کے صدر نے کہا کہ پولیس ملزمان کی تلاش کرے اور انہیں سخت سے سخت سزا دی جائے،  سندھ حکومت چائلڈ پروٹیکشن کے قانون پر عملدآمد کروانے میں مکمل ناکام ہوچکی ہے،  معصوم بچوں پر ظلم ڈھانے والے کسی رعایت کے مستحق نہیں۔

اس سے قبل ایدھی فاؤنڈیشن کی شریک سربراہ بلقیس ایدھی نے کہا کہ گلشن حدید کی کچرا کنڈی سے ملنے والے نومولود بچے کا جسم 90 فیصد جل چکا ہے تاہم بچے کے علاج کے لیے ہر ممکن اقدام اٹھایا جائے گا۔

واضح رہے کچھ دیر پہلے کراچی کے علاقے گلشن حدید کی کچرا کنڈی میں چند نامعلوم افراد ایک نومولود بچے کو پھینک کر فرار ہوگئے تھے جس کے بعد کچرا کنڈی میں آگ لگادی گئی تھی جب کہ پولیس نے نومولود کو تشیوشناک حالت میں جناح اسپتال منتقل کیا جہاں اسے طبی امداد دی جارہی ہے۔