سپریم کورٹ نے ریمارکس دیئے ہیں کہ چائلڈ پورنو گرافی ویڈیوز سوشل میڈیا پر پھیلانے والے ضمانت کے مستحق نہیں۔

سپریم کورٹ نے چائلڈپورنوگرافی ویڈیوز سوشل میڈیا پر پھیلانے کے ملزم عمر خان کی درخواست ضمانت مسترد کر تے ہوئے ٹرائل کورٹ کو کیس کا جلد فیصلہ کرنے کا حکم دے دیا۔

سپریم کورٹ نے اپنے فیصلے میں قرار دیا کہ چائلڈ پورنو گرافی معاشرے کا بڑا ناسور اور تباہی کا باعث بنتی جا رہی ہے، بچوں کے مستقبل اور اخلاقیات کیلئے چائلڈ پورنوگرافی سنگین خطرہ ہے، چائلڈ پورنو گرافی بچوں کے ساتھ جنسی ذیادتی کے واقعات کی بڑی وجہ ہے۔ چائلڈ پورنو گرافی کے بڑھتے خطرے کیساتھ آہنی ہاتھوں سے نمٹنا ہوگا، چائلڈ پورنو گرافی ویڈیوز پھیلانا معاشرے کو کھوکھلا کرنے کا جرم ہے۔

عدالت عظمیٰ نے اپنے فیصلے میں کہا کہ ملزم کے وکیل کی یہ دلیل قابل قبول نہیں کہ کوئی متاثرہ فریق سامنے نہیں آیا، ملزم عمر خان پر کیس بچوں کی گندی ویڈیو پھیلانے کا ہے بنانے کا نہیں، ملزم عمر خان کی شکایت براہ راست فیس بُک انتظامیہ کی جانب سے کی گئی تھی۔

واضح رہے کہ ملزم عمر خان کیخلاف ایف آئی اے ایبٹ آباد نے مقدمہ درج کر رکھا ہے، اس پر کم سن بچیوں سے زیادتی کی وڈیو سوشل میڈیا پر وائرل کرنے کا الزام ہے۔