بھارتی شہر بھوپال میں تیندوے کے جبڑے سے اپنے بچے کو چھڑانے والی خاتون کے چرچے ہورہے ہیں۔

بھارتی ریاست مدھیہ پردیش کے شہر بھوپال میں ایک خاتون کے بہادری کے چرچے ہورہے ہیں جس نے تیندوے کے جبڑے سے اپنے 6 سالہ بچے کو بچالیا۔

تفصیلات کے مطابق بھوپال کے گاؤں بڑی جھریا کی رہائشی خاتون شام کے وقت اپنے جھونپڑی کے باہر بیٹھے اپنے شوہر کے گھر واپس آنے کا انتظار کررہی تھی اور اس دوران ان کی گود میں نومولود بھی موجود تھا جب کہ باقی دو بچے ساتھ ہی بیٹھے ہوئے تھے جن میں 6 سال کا راہل بھی شامل تھا۔

قبائلی خاتون اپنے پاس ہی بیٹھے تیندوے سے بے خبر تھی جو اپنے شکار کی طاق میں چھپ کر بیٹھا ہوا تھا اور جیسے ہی خاتون کا رخ دوسری جانب ہوا، تیندوے نے 6 سالہ راہل کو دبوچ لیا اور اسے اپنے جبڑے میں دباکر ایک طرف کو بھاگ گیا۔

نڈر خاتون نے فوراً اپنی گود میں موجود نومولود کو دوسرے بچے کے حوالے کیا اور انہیں گھر کے اندر جانے کا کہہ کر اندھیرے میں تیندوے کے پیچھے بھاگی جو آگے چل کر ایک کونے میں بیٹھ چکا تھا۔

قبائلی خاتون نے بغیر کسی ہتھیار یا ڈنڈے کے تیندوے کا بھرپور مقابلہ کیا اور آخر کار اپنے بچے کو اس کے چنگل سے چھڑانے میں کامیابی حاصل کی لیکن اس دوران نہ صرف خاتون بری طرح زخمی ہوئی بلکہ  تیندوے کے حملے سے 6 سالہ بچے کی آنکھ کو بھی شدید نقصان پہنچا اور وہ بہت زیادہ خوفزدہ ہوگیا تھا۔